Það gekk töluvert betur hjá Hjallastefnunni á síðasta rekstrarári en árið á undan. Samstæðan skilaði 144 milljóna króna hagnaði, en hagnaðurinn hafði verið 35 milljónir árið áður. Tekjurnar tóku einnig stökk og fóru úr 6,8 milljörðum í tæpa átta milljarða króna.

Viðskiptablaðið greindi fyrst frá.

Betri afkoma skýrist meðal annars af nýjum samningum við sveitarfélög og leiðréttingu á einingaverði. Laun og launatengd gjöld voru tæpir 6,5 milljarðar króna og hjá samstæðunni voru 585 stöðugildi.

Eignir Hjallastefnunnar voru 1,1 milljarður króna og eigið fé 293 milljónir. Margrét Pála Ólafsdóttir stofnaði Hjallastefnuna og er jafnframt stærsti eigandi hennar.