Héraðsdómur Reykjavíkur hefur dæmt B 2001 ehf. til að greiða Verkþjónustu Sigurjóns slf. rúmar 337 þúsund krónur vegna aukaverka sem unnin voru við glugga- og hurðaskipti. Jafnframt var Verkþjónustan sýknuð af 382 þúsund króna gagnkröfu félagsins vegna meintra skemmda og muna sem sagðir voru hafa horfið úr íbúð.
Málið á rætur að rekja til framkvæmda þar sem Verkþjónusta Sigurjóns tók að sér gluggaskipti og glerjun á fasteign. Upphaflegt tilboð hljóðaði upp á rúmar 1,16 milljónir króna og tók til fjórtán glugga. Við framkvæmdirnar var einnig óskað eftir ísetningu tveggja hurða.
Verktakinn gaf síðar út reikning upp á 337.380 krónur vegna aukavinnu. B 2001 mótmælti reikningnum og taldi vinnuna meðal annars eiga að rúmast innan upphaflega tilboðsins.
Á meðan framkvæmdunum stóð leigði verktakinn jafnframt húsnæði af eigendum félagsins. Í tölvupósti í lok júlí 2024 kom fram samkomulag um að verktakinn greiddi 150 þúsund króna leigu gegn því að reikningurinn vegna aukavinnunnar yrði greiddur. Dómurinn taldi tölvupóstinn fullnægjandi sönnun þess að slíkt samkomulag hefði náðst.
Eftir að starfsmenn verktakans yfirgáfu húsnæðið hélt B 2001 því fram að ýmsir munir hefðu horfið, meðal annars handklæði, matvæli, kertastjakar, vasar, kristalsskálar og postulínsmunir. Þá var einnig haldið fram að blöndunartæki hefði skemmst. Félagið krafðist 382 þúsund króna í bætur.
Dómurinn taldi hins vegar að ekkert hefði verið lagt fram sem sýndi með fullnægjandi hætti fram á tjónið eða að umræddir munir hefðu yfirhöfuð verið í íbúðinni þegar starfsmenn verktakans höfðu hana til afnota. Gagnkröfunni var því hafnað.
B 2001 var auk þess gert að greiða Verkþjónustu Sigurjóns 630 þúsund krónur í málskostnað, auk höfuðstólsins og dráttarvaxta frá 1. júlí 2024.
