Laus staða sóknarprests Breiðholtsprestakalls hefur verið auglýst til umsóknar hjá Þjóðkirkjunni. Umsóknarfrestur um starfið rennur út 21. september.

Breiðholtsprestakall nær yfir tvær sóknir, Fella- og Hólasókn og Breiðholtssókn. Tvær sóknarkirkjur tilheyra prestakallinu, Breiðholtskirkja og Fella- og Hólakirkja, og fer fram fjölbreytt safnaðarstarf í þeim báðum.

Alls búa 13.025 manns innan marka prestakallsins en þar af eru 4.384 skráð sóknarbörn. Biskup Íslands ræður í embætti sóknarprests að lokinni yfirferð yfir allar gildar umsóknir.

Gerð er krafa um að umsækjendur hafi lokið mag.theol.- eða cand.theol.-prófi frá Háskóla Íslands ásamt tilskilinni starfsþjálfun hjá Þjóðkirkjunni.

Ráðning nýs sóknarprests kemur til með að snúa að þjónustu við báðar sóknir prestakallsins og því safnaðarstarfi sem fram fer í kirkjunum tveimur.