Sjö lögreglumenn urðu fyrir árásum í átökum við mótmælendur í Portsmouth á Englandi um helgina. Um 200 svartklæddir mótmælendur komu saman í borginni til að mótmæla komu hælisleitenda til Bretlands.
Mótmælin brutust út eftir að bátur með um 140 hælisleitendur innanborðs var stöðvaður undan ströndinni á sunnudagskvöld. Hópur mótmælenda reyndi að koma í veg fyrir að fólkið yrði flutt á brott af svæðinu og kom til átaka við lögreglu.
Spencer Wragg, formaður lögreglusambandsins Hampshire Police Federation, segir sjö lögreglumenn hafa orðið fyrir árásum. Enginn þeirra hafi þó hlotið alvarleg meiðsl. Þá hafi nokkrar lögreglubifreiðar orðið fyrir skemmdum.
„Það sem við sáum var fólk brjóta lög, ráðast á lögreglumenn og valda eignaspjöllum,“ sagði Wragg í samtali við LBC. Hann sagði atburðina jafnframt hafa verið ógnvekjandi fyrir íbúa svæðisins.
Enginn var handtekinn á vettvangi en rannsókn stendur yfir. Wragg kveðst gera ráð fyrir að handtökur verði gerðar á næstu dögum eða vikum.
Breska innanríkisráðuneytið hefur fordæmt framferði mótmælenda og lýst því sem ógnandi og ofbeldisfullu. Áhyggjur hafa aukist af frekari óeirðum og mótmælum öfgahægrihópa víða um Bretland, einkum við suðurströnd landsins.
Atvikið í Portsmouth átti sér stað innan við tveimur sólarhringum eftir að grímuklæddir mótmælendur lokuðu vegum í Dover. Samkvæmt breskum stjórnvöldum hafa 625 manns farið ólöglega yfir Ermarsund til Bretlands á síðustu sjö dögum.
Jafnframt hafa vaknað áhyggjur af því að smyglarar kunni að beina bátum í auknum mæli að öðrum stöðum við strendur Englands.
