Skipulags- og umhverfisráð hefur veitt eigendum Holtagerðis 58 viðurkenningu fyrir einstaka umhirðu húss og lóðar. Húsið, sem er eitt af hinum þekktu og fallegu Sigvaldahúsum á Kársnesinu, hefur verið varðveitt í upprunalegum stíl með mikilli alúð.

Eigendur hússins, þau Elín Guðbjartsdóttir og Marten Ingi Lövdahl, hafa lagt ríka áherslu á að halda í upprunalegan svip og karakter bæði hússins og garðsins, á sama tíma og eigninni er sinnt af kostgæfni.

Húsið var reist árið 1961 og hefur verið haldið einstaklega vel í gegnum tíðina. Við allar endurbætur og viðgerðir hefur þess verið gætt að virða upprunalega hönnun og viðhalda ytra útliti þess.

Garðurinn einstök prýði

Garðurinn þykir ein helsta prýði eignarinnar. Hann hefur að stórum hluta haldið sínu upprunalega skipulagi en á sama tíma þróast í takt við þarfir og reglulega umhirðu. Í garðinum er að finna fjölbreyttan gróður, falleg tré og runna. Þar á meðal er glæsilegur hlynur sem setur sterkan og eftirtektarverðan svip á umhverfið.

Sérstaka athygli vekur skjólgóður hluti garðsins, svokölluð „gryfja“. Þar hefur verið skapað notalegt rými þar sem blómstrandi gróður og sígrænar plöntur fá að njóta sín árið um kring, og myndar svæðið einstaka óraskandi heild með hinu merka Sigvaldahúsi.