Leikkonan Ruby Rose hefur sakað tónlistarkonuna Katy Perry um kynferðislegt áreiti í færslum sem hún birti á samfélagsmiðlinum Threads. Rose greindi frá því að atvikið hafi átt sér stað á næturklúbbnum Spice Market í Melbourne þegar hún var á þrítugsaldri.

Ummæli Rose komu fram í kjölfar færslu frá miðlinum Complex Music þar sem fjallað var um viðbrögð Perry við tónleikum Justin Bieber á Coachella-hátíðinni. Í svari við þeirri færslu setti Rose fram alvarlegar ásakanir á hendur Perry.

Í frekari færslum lýsti Rose atvikinu nánar og sagði það hafa haft djúpstæð áhrif á sig. Hún kvaðst hafa þurft nærri tvo áratugi til að treysta sér til að tjá sig opinberlega um málið. „Það hefur tekið mig tæp tuttugu ár að segja þetta upphátt,“ skrifaði hún og bætti við að slíkt sýni hversu mikil áhrif áföll og kynferðisofbeldi geti haft.

Rose sagðist jafnframt upplifa að erfiðara væri að stíga fram með ásakanir þegar um væri að ræða ofbeldi milli kvenna. Hún lýsti einnig atvikinu með nánari hætti í svörum við fylgjendum sínum og þakkaði þeim sem sýndu henni stuðning.

Þá hélt Rose því fram að Perry hafi eftir atvikið boðist til að aðstoða hana við að fá vegabréfsáritun til Bandaríkjanna. Hún sagðist þó ekki hafa áhuga á að kæra málið formlega, en útilokaði ekki að það gæti ratað fyrir dómstóla ef Perry myndi grípa til lagalegra aðgerða.

Engin opinber viðbrögð hafa borist frá Katy Perry vegna ásakananna þegar þetta er ritað.