Fáir hafa vakið jafn mikla athygli á samfélagsmiðlum undanfarna tvo daga en Ari Edwald, oddviti Miðflokksins í Reykjavík, en í fyrradag birti hann myndband af sér að aka í miðbæ Reykjavíkur.
Í myndbandinu sést stjórnmálamaðurinn aka Austurstræti, frá Pósthússtræti að Ingólfstorgi, en gatan var gerð að göngugötu seinni hluta 2025. Það að aka götuna er því brot á umferðarlögum. Í myndbandinu kvartar Ari undan bílastæðaskorti í götunni og bendir í átt að stöðum sem eitt sinn voru bílastæði.
Í athugasemdakerfi við myndbandið er Ara bent á að um sé að ræða göngugötu og hann ætti því ekki að keyra á henni
„Ég vissi ekki að bílaumferð væri bönnuð þarna (sá ekki skiltin, var að horfa á myndirnar af sundlaugunum),“ skrifaði Ari sem svar við þeirri ábendingu.
Aðeins þrjár leiðir eru fyrir bíla að komast á þann stað sem bíll Ara var staðsettur þegar myndbandið hefst og fer Mannlíf yfir þær leiðir.
Líklegasta leiðin er að Ari hafi beygt til vinstri af Pósthússtræti þar sem hann kemur frá Austurvelli en þar er að finna skilti sem sýnir greinilega að það er bannað.
Mögulegt er að Ari hafi komið úr gagnstæðri átt og beygt til hægri en til þess að gera það hefur hann þurft að missa af skilti þar sem er tekið fram að innakstur sé bannaður.
Ólíklegasta leið Ara er sú að hann hafi ekið niður efri hluta Austurstrætis en eins og má sjá á myndinni hér fyrir neðan er það hægara sagt en gert vegna hindrana en þá er einnig að finna skilti þar sem tekið er fram að um göngugötu sé að ræða.
