Ari Edwald, oddviti Miðflokksins í Reykjavík og lögmaður, braut lög ef marka má myndband sem hann setti á samfélagsmiðla í gær.
Í myndbandinu sést stjórnmálamaðurinn aka Austurstræti, frá Pósthússtræti að Ingólfstorgi, en gatan var gerð að göngugötu í nóvember 2025. Það að aka götuna er því brot á umferðarlögum. Í myndbandinu kvartar Ari undan bílastæðaskorti í götunni og bendir í átt að stöðum sem eitt sinn voru bílastæði.
Myndbandið hefur vakið mikla athygli á samfélagsmiðlum og er fólk mishrifið af kvarti oddvitans.
„Nóg af stæðum. Ég er fluttur úr Miðbænum en kem þangað á hverjum degi. Aldrei vandamál að fá stæði. Hins vegar er vandamál þegar menn keyra á nöglum eins og heyra má í myndbandinu. Og - ég hef aldrei séð þig í Miðbænum þar sem ég bjó í 23 ár svo það er erfitt að skilja þessar skyndilegu áhyggjur,“ skrifar fjölmiðlamaðurinn Egill Helgason í athugasemdakerfi Ara.
„Varðandi nagladekkin er komið að skiptum en ég á líka mikil erindi í efri byggðir borgarinnar þar sem snjór er lítið mokaður nema af hjólastígum og mikill klaki. Síðast snjóbylur fyrir viku síðan. En tekið til greina,“ skrifar Ari í svari til Egils og í öðru svari rifjar hann upp búsetu sína í Reykjavík.
Í tilkynningu frá Reykjavíkurborg, sem Ari sækist eftir að stýra, frá því í nóvember í fyrra kemur fram að þrátt fyrir breytinguna sé opið fyrir vörulosun milli sjö og ellefu á virkum dögum og átta og ellefu um helgar. Þá sé fólk með stæðiskort hreyfihamlaðra undanþegið banni við akstri á götunum auk þess sem lögregla, sjúkralið og slökkvilið hafi þar óskertan aðgang.
