Tæplega 800 þúsund sinnum hefur verið horft á myndband af systur níu ára stúlkunnar sem lést í Reynisfjöru þann 2. ágúst. Í myndbandinu, sem birt var á samfélagsmiðlum, sést hún hrópa á hjálp fyrir systur sína sem hafði farið í sjóinn og komst ekki aftur í land.

Í myndbandinu sjást einnig á annan tug ferðamanna, sumir með síma á lofti, að horfa á níu ára stelpuna í sjónum. Greint hefur verið frá því að stelpan sem lést hafi verið frá Þýskalandi og var stödd í Reynisfjöru með föður sínum og systur.

Tæplega fjögur hundruð athugasemdir hafa verið skrifaðar við myndbandið þegar þetta er skrifað og tjá flestir sorg sína eða spyrja af hverju fólk fari svo nálægt sjónum þegar það eru skilti sem bendi á þá hættu sem getur verið til staðar. Þá fordæma einhverjir í athugasemdakerfinu þá ákvörðun að setja myndbandið á samfélagsmiðla.

Mannlíf mun ekki birta myndbandið.

Annað myndband, sem Mannlíf hefur sagt frá áður, sýnir ungu stúlkuna í sjónum hefur einnig verið í dreifingu en ekki fengið jafn mikla athygli.

Eins og greint hefur verið frá var þyrla Landhelgisgæslunnar var send á vettvang og náði björgunarfólk barninu upp úr sjónum. Hún var úrskurðuð látin á sjúkrahúsi.

Þetta er sjötta banaslysið í Reynisfjöru á undanförnum tíu árum.

Í tilkynningu frá landeigendum í Reynisfjöru, Ferðamálastofu, lögreglunni á Suðurlandi, Safe Travel og Björgunarsveitinni Víkverja sem send var út í gær kemur fram að ákveðið hafi verið að breyta hættustuðli í fjörunni og mun því rautt viðvörunarljós að kvikna við minna tilefni en áður. Gult ljós var á skiltinu þegar slysið átti sér stað.