Fréttaskýringaþátturinn Kveikur fjallaði í gærkvöldi um hvernig þétting byggðar væri að fjölga íbúðum nærri stofnbrautum vegakerfisins. Þar kemur fram að Ólafur Hjálmarsson, verkfræðingur með sérhæfingu í hljóðvist, „óskar engum þess að búa“ í nýjum íbúðum sem byggðar eru upp við Hringbraut í Hlíðarendahverfinu.

Björn Teitsson, borgarfræðingur og fyrrverandi formaður Samtaka um bíllausan lífsstíl, gagnrýnir framsetningu Kveiks í þættinum.

„Þetta er virkilega furðuleg framsetning. Svo ekki sé meira sagt. Það er alveg skýrt hver er mengunar- og skaðvaldurinn. Það er ljóst að frá því á 6. áratugi síðustu aldar hafa verið byggðar íbúðir nálægt stofnbrautum. Hávaðinn eykst, því fjöldi og þyngd bíla eykst. En nei. Bílar eru ekki vandamál. Fólk er vandamál. Við þurfum bara að flýja undan bílum, haga öllu okkar lífi eftir því hvar bílar aka um. Þetta er alveg sturlað. Eins og Will Ferrell í Zoolander, mér líður eins og ég sé að taka crazy pills,“ segir Björn.

Að mati Björns hefði verið rétt að beina sjónum að skorti á almenningssamgöngum. „Án djóks, mikilvægt að benda á þetta vandamál, eitt af mörgum mjög alvarlegum vandamál sem magn umferðar og fjöldi bíla veldur okkur í okkar lífi, mun meira en aðrar þjóðir glíma við - en þessi framsetning er alveg kolrugluð. Takið á ríki og sveitarfélögum fyrir að gera ekki nægilega vel við að tempra umferð með því að hraða uppbyggingu almenningssamgangna, en að við þurfum nú að færa byggð frekar en taka á grunnvandanum, jeminn,“ segir hann og beinir spjótum að flugvellinum. „Það er mun meiri hávaði frá þessum blessaða flugvelli í nýja Hlíðarendahverfinu. Það er samt einhvern veginn engin frétt.“

Hilmar Þór Björnsson arkitekt þylur upp mótvægisaðgerðir. „Banna nagladekk, minnka hraðann, fjölga rafmagnbílum og hanna hús og deiliskipulag i samræmi við hljóðvist.“

Undir þetta tekur íbúi við Miklubraut. „Ég get staðfest að tvöfalt misþykkt gler, engin opnanleg fög að götu og loftræsing yfir þak í ónotuðum skorsteini virkar vel á Miklubraut 62,“ segir hann.

„Nagladekk og hraði eru risastórir áhrifavaldar sem var ekki einu sinni minnst á. Ótrulega slöpp vinnubrögð,“ segir Björn, sem er menntaður í borgarfræðum frá Bauhaus-háskólanum í Þýskalandi, fyrrverandi fréttamaður RÚV og starfar hjá Skipulagsstofnun.

Umfjöllun Kveiks sneri að því að reglur um hljóðvist í íbúðum kveði á um að hávaði við húsvegg megi ekki vera meiri en 30 desíbel, en að undanþágur leyfi nýbyggingar á hávaðasömum svæðum þar sem önnur hliðin vísar að hljóðlátum húsgarði. Þannig búi 64 þúsund íbúar við hávaða og geti ekki opnað gluggann hávaðalaust. „Þetta er eins og ryksugan sé í gangi,“ segir Ólafur verkfræðingur við Kveik.