Brottvísun Oscars Anders Florez Bocanegra, sautján ára pilts frá Kólumbíu, hefur verið frestað á meðan beðið er eftir niðurstöðu í umsókn hans um íslenskan ríkisborgararétt.

Helga Vala Helgadóttir, lögmaður Oscars og fósturforeldra hans, Svavars Jóhannssonar og Sonju Magnúsdóttur, staðfestir þetta í samtali við fréttastofu Vísis.

Kærunefnd útlendingamála hafði áður hafnað því að taka umsókn Oscars um landvistarleyfi til efnislegrar meðferðar og stóð til að vísa honum úr landi á morgun. Fósturforeldrar hans hafa lýst því yfir að með því væri verið að senda hann út í lífshættu á götum Bogotá.

Oscar kom hingað til lands með föður sínum árið 2022, en eftir að hafa orðið fyrir ofbeldi af hans hálfu, var hann tekinn í fóstur af Svavari og Sonju og hefur búið hjá þeim síðan.