Fjórir ökumenn voru handteknir vegna gruns um ölvunar- og/eða fíkniefnaakstur og tveir þeirra reyndust sviptir ökuréttindum.

Óskað var aðstoðar lögreglu vegna umferðarslyss - þar hafði rafmagnshlaupahjól og bifreið lent saman en sem betur fer urðu engin slys á fólki og minniháttar eignatjón og málið er í rannsókn.

Aðili var handtekinn í miðbæ Reykjavíkur fyrir ofbeldistilburði og ölvunarlæti; reynt var að tala um fyrir manninum en það var með öllu árangurslaust og var hann því vistaður í fangaklefa.

Annar aðili var handtekinn fyrir að reyna að stofna til slagsmála; vistaður í fangaklefa.

Skráningarmerki voru fjarlægð af ótryggðri bifreið.

Ökumaður var stöðvaður í almennu eftirliti - blés undir refsimörkum og var gert að hætta akstri.

Tilkynnt var um þjófnað á skráningarmerkjum. Málið í rannsókn.

Tilkynnt var um yfirstandandi innbrot á byggingarsvæði. Einn handtekinn og fluttur á lögreglustöð til vistunar.

Tveir menn voru handteknir fyrir brot á lögreglusamþykkt fyrir Reykjavíkurborg; að sögn lögreglu voru báðir mennirnir peruölvaðir og alls ekki í skýrsluhæfu ástandi og þeir vistaðir í fangaklefa.

Leigubílstjóri var aðstoðaður vegna farþega er neitaði að greiða fargjaldið og var málið afgreitt án vandræða.

Ökumaður var kærður fyrir of hraðan akstur en hann mældist á 103 kílómetra hraða þar sem er 60 kílómetra hámarkshraði; afgreitt með umferðarskýrslu á vettvangi.

Ökumaður var kærður fyrir að vera með filmur í framrúðum bifreiðar sinnar og var málið afgreitt með umferðarskýrslu á vettvangi og bifreiðin boðuð í skoðun.