Gummi Kíró, eða Guðmundur Birkir Pálmason, sem þekktur fyrir áhuga sinn og kaup á dýrri merkjavöru, skilur eftir sig 34,5 milljóna króna skuldir við gjaldþrot félags hans.
Gummi beitti þeirri aðferð að breyta nafni félagsins áður en það fór í gjaldþrot. Tilkynning um breytinguna fór í gegn 1. október síðastliðinn. Áður hét það Kírópraktorstöð Reykjavíkur ehf. en nýtt nafn var minna gagnsætt: GBN-2024 ehf. Undir tilkynninguna rituðu Gummi og unnusta hans, Lína Birgitta Sigurðardóttir áhrifavaldur, sem var varamaður í stjórn félagsins.
Sjá einnig: Gummi Kíró útskýrir gjaldþrotið: „Það má segja að þetta hafi byrjað í Covid“
Rúmum mánuði eftir nafnabreytinguna í vetur var félagið tekið til gjaldþrotaskipta. Félagið hafði ekki skilað ársreikningi fyrir árið 2023.
Náði ekki að greiða skatt
Gummi hefur rekið fyrirtækið, sem er á sviði hnykklækninga, undanfarin ár og kynnt það vel. Fram kemur í Lögbirtingablaðinu, eins og Vísir benti á í morgun, að gerðar hefðu verið 34,5 milljón króna kröfur í þrotabúið. Sjálfur greindi hann frá því að hann hefði sameinast annarri kírópraktorstöð.
Síðasta haust gerði hann upp gjaldþrotið í viðtali við Smartlandið á mbl.is og sagðist ekki hafa náð að greiða allan skatt af starfseminni. „Það má segja að þetta hafi byrjað í covid þar sem röð misstaka gerði það að verkum að það [söfnuðust] upp skuldir hjá félaginu. Fyrirtæki fengu þann möguleika á að frysta greiðslur til skattsins eða staðgreiðslu vegna launa greiðsla sem og við nýttum okkur á sínum tíma. Laun hjá fyrirtækinu voru há og skuldin hækkaði hratt. Ég náði að lækka heildarskuldir heilmikið niður en síðasti hjallinn var skatturinn og á endanum náði ég ekki að semja við hann,“ játaði hann.
Flíkar dýrum merkjum
Gummi hefur vakið athygli síðustu ár fyrir frásagnir hans af afar dýrum smekk. Hann komst í fréttirnar fyrir þremur árum þegar hann keypti bíl sem upprunalega kostaði 13 milljónir króna, með einkanúmerið KÍRÓ, eins og kom fram í umfjöllun Smartlandsins á þeim tíma. Þetta var árið 2022, eða eftir að fjárhagserfiðleikar félagsins hans hófust. Engu að síður var bifreiðin skráð á félagið, Kírópraktorstöð Reykjavíkur.
Árið 2022 lýsti Gummi rándýrum fatasmekk sínum í viðtali við Stöð 2. Þar kom fram að uppáhaldsmerki hans væru Celine, Balenciaga og Balmain. Í gegnum tíðina hafi hann einnig verið hrifinn af Gucci og Louis Vuitton. Hann sýndi í viðtalinu nýja peysu frá Celine sem kostaði 120 þúsund krónur.
Þá lýsti hann því hvernig verslunarstjóri Gucci náði við hann góðum tengslum.
„Mér finnst skemmtilegast að versla í París. En Stokkhólmur er líka æðislegur staður til að versla. Ég bjó þar á sínum tíma og það er gaman að segja frá því að þegar ég geng inn í Gucci búðina þá kemur sá sem sér um búðina alltaf til mín og gefur mér kampavín og kaffi og við spjöllum mjög mikið og það er mjög skemmtilegt,“ sagði hann.
„Svarta beltið í að versla“
Þrátt fyrir gjaldþrotið og að ekki hafi tekist að greiða kröfuhöfum heldur Gummi áfram að versla. Í síðustu viku birti hann mynd af sér með innkaupapoka í París, klæddur í peysu frá Celine, með textanum: „Svarta beltið í því að versla“.
Þá birtir hann af sér myndir í Róm fyrr í vetur, auk þess að birta kynningar á ýmsum vörum.
Gummi Kíró segist hafa sameinast Líf Kíró ehf. Það er hins vegar að 100% í eigu Vignis Þórs Bollasonar kírópraktors. Hann var í fréttunum í fyrra þegar eiginkona hans, hjúkrunarfræðineminn og fegurðardrottningin Arna Ýr Jónsdóttir, sagðist hafa eytt 8-9 milljónum króna í brúðkaup þeirra hjóna og að hún sæi ekki eftir því. Brúðkaupið var haldið í veislusal Sjálands í Garðabæ, en þar varð annað en ótengd gjaldþrott upp á 780 milljónir króna sem leiddi nýlega af sér ákæru um skattsvik eiganda þess.
Sjá einnig: Gummi kíró notar frekar Tom Ford sólgleraugu en Moxen Eyewear – Kosta um 70 þúsund krónur
