Rússland hefur stækkað svokallaðan „skuggaflota“ sinn til flutninga á fljótandi jarðgasi (LNG) með því að bæta við bæði notuðum gasflutningaskipum og fyrstu tankskipunum sem smíðuð hafa verið innanlands. Þetta kemur fram í umfjöllun Financial Times sem byggir á gögnum frá greiningarfyrirtækinu Windward.
Samkvæmt greiningunni hefur skuggafloti Rússa fyrir LNG-flutninga stækkað í 25 skip á síðustu sex mánuðum. Þar af eru að minnsta kosti átta notuð tankskip og tvö ný skip sem smíðuð voru í Zvezda-skipasmíðastöðinni í Rússlandi.
Flest skipanna eru skráð á skúffufyrirtæki sem tengjast Rússlandi og eru með skráningu í lögsögum á borð við Dúbaí, Hong Kong og Singapúr.
Stærsti aðilinn á rússneskum LNG-markaði er Novatek. Yamal LNG-verksmiðja fyrirtækisins í Síberíu og Arctic LNG 2-verkefnið, sem sætt hefur refsiaðgerðum Vesturlanda, standa saman undir meira en 65 prósentum af framleiðslu Rússlands á fljótandi jarðgasi. Um 30 prósent framleiðslunnar koma frá Sakhalin-2-verkefni Gazprom í Austurlöndum fjær.
Financial Times segir Kína vera stærsta kaupanda gass frá Arctic LNG 2. Samkvæmt mati blaðsins og greiningarfyrirtækisins Kpler annast ellefu skip, sem eru að meðaltali tíu ára gömul, flutninga frá verkefninu. Farmurinn er síðan fluttur yfir á hefðbundin tankskip við fljótandi umskipunarstöðvar áður en hann heldur áfram til Kína.
Stækkun gasflutningaflotans á að gera Moskvu kleift að halda áfram útflutningi á LNG þegar bann Evrópusambandsins við innflutningi á rússnesku fljótandi jarðgasi tekur gildi 1. janúar 2027. Fyrirmyndin er svokallaður skuggafloti olíuflutningaskipa, sem telur nú yfir eitt þúsund skip.
Financial Times bendir þó á að uppbygging skuggaflota fyrir gasflutninga hafi gengið hægar en fyrir olíuflutninga þar sem LNG-skip eru mun tæknilega flóknari.
Fréttastofan Reuters greindi frá því að Novatek hefði stöðvað framleiðslu á fljótandi jarðgasi í Arctic LNG 2-verkefninu í apríl 2024 vegna refsiaðgerða og skorts á sérhæfðum flutningaskipum. Þá hafði fyrirtækið aðeins þrjú sérsmíðuð skip til umráða af þeim fimmtán sem fyrirhuguð voru árið 2020.
Til stóð að bann við flutningum á rússnesku LNG til þriðju ríkja yrði hluti af 21. refsiaðgerðapakka Evrópusambandsins gegn Rússlandi. Grikkland lagðist hins vegar gegn þeirri tillögu, meðal annars með hagsmuni skipafélagsins Dynagas að leiðarljósi, og var ákvæðið að lokum fellt út úr nýjasta refsiaðgerðapakkanum.
