Lögreglan á höfuðborgarsvæðinu hafði í nógu að snúast samkvæmt nýjustu dagbók embættisins. Fjöldi ökumanna var stöðvaður vegna umferðarlagabrota og eru sex þeirra grunaðir um akstur undir áhrifum ávana og fíkniefna.
Í einu tilviki stöðvaði lögregla fimm ökumenn sem reyndust allir vera undir áhrifum ávana og fíkniefna. Annar ökumaður var síðar stöðvaður og reyndist einnig vera undir áhrifum slíkra efna. Málin fóru í hefðbundið ferli hjá lögreglu.
Tveir ökumenn voru stöðvaðir vegna hraðaksturs þar sem hámarkshraði er 60 kílómetrar á klukkustund. Annar þeirra mældist á 93 kílómetra hraða en hinn á 91 kílómetra hraða. Málin voru afgreidd á vettvangi.
Þá voru fjórir ökumenn stöðvaðir fyrir að aka gegn rauðu ljósi og voru lögregluskýrslur ritaðar vegna brotanna. Aðrir fjórir voru stöðvaðir fyrir að aka um göngugötu.
Lögregla hafði einnig afskipti af ökumanni sem var með of marga farþega í bifreið sinni og tveimur ökumönnum sem notuðu ekki handfrjálsan búnað við akstur. Einn ökumaður reyndist hafa verið sviptur ökuréttindum.
Skráningarmerki voru tekin af nokkrum ökutækjum þar sem eigendur þeirra höfðu ekki staðið skil á tryggingum. Einn ökumaður fékk jafnframt áminningu vegna bilaðs framljóss.
Tilkynningar bárust um innbrot og þjófnað, þar á meðal úr bifreið, og eru þau mál til rannsóknar.
Lögregla hafði einnig afskipti af ölvuðum einstaklingum og var einum þeirra vísað út að beiðni annarra. Þá var einstaklingur handtekinn vegna brots á lögreglusamþykkt og vistaður í fangaklefa þar til hann yrði hæfur til skýrslutöku.
Að lokum barst tilkynning um grunsamlegar mannaferðir en þegar lögreglu bar að var engan að sjá.
