Þrír nemendur við University of South Alabama í Bandaríkjunum hafa verið handteknir og ákærðir fyrir að hafa hótað Donald Trump Bandaríkjaforseta lífláti í aðdraganda heimsóknar hans í skólann.
Nemendurnir, Amare Woods, Cameron Lewis og Kayla Smith, voru handteknir á föstudag og eru nú í haldi. Samkvæmt bandarískum fjölmiðlum telur alríkislögreglan FBI að þau hafi hvert í sínu lagi birt ummæli á samfélagsmiðlum sem túlkuð voru sem hótanir gegn forsetanum.
Málið kom upp eftir að yfirvöld fóru yfir færslur á samfélagsmiðlum vegna fyrirhugaðrar heimsóknar Trump í háskólann. Við þá leit fundust nokkrar færslur sem vöktu athygli rannsakenda.
Woods er sakaður um að hafa skrifað á TikTok að forsetinn „þyrfti að deyja“. Lewis er meðal annars sakaður um að hafa birt færslu þar sem hann vísaði til Utah Valley University, þar sem Charlie Kirk var myrtur, og gefið í skyn að sambærilegur atburður gæti átt sér stað við University of South Alabama.
Smith er sökuð um að hafa brugðist við TikTok-færslu um væntanlega heimsókn Trump með orðunum: „Við fáum aðeins eitt tækifæri, grípum það.“ Með færslunni birti hún jafnframt mynd af einstaklingi sem virtist þykjast halda á skotvopni.
Jason Darley, lögmaður Woods, hefur lýst handtökunni sem alvarlegri stöðu fyrir skjólstæðing sinn. Hann sagði Woods ungan mann sem væri afar ólíkur þeim sakborningum sem hann hefði áður varið í alríkisdómstólum á rúmlega tveggja áratuga ferli sínum.
Þremenningarnir eiga að koma fyrir dómara á mánudag þar sem tekin verður afstaða til áframhaldandi gæsluvarðhalds þeirra. Rannsókn málsins er í höndum alríkisyfirvalda.
