Tveir dyraverðir voru handteknir eftir að þeir veittust að manni með höggum og spörkum á höfuðborgarsvæðinu í gærkvöldi og nótt. Mennirnir voru látnir lausir að lokinni skýrslutöku.
Þetta kemur fram í dagbók lögreglunnar á höfuðborgarsvæðinu, en nokkuð var um verkefni tengd ölvun og akstri undir áhrifum.
Nokkrar tilkynningar bárust meðal annars um ofurölvi einstakling sem truflaði umferð með því að reyna að fara fyrir bíla. Hann er jafnframt sagður hafa haft í hótunum við gangandi vegfaranda. Lögregla handtók einstaklinginn og var hann vistaður í fangaklefa vegna gruns um brot á lögreglusamþykkt Reykjavíkur.
Þá hafði lögregla afskipti af nokkrum ökumönnum vegna gruns um akstur undir áhrifum. Þrír voru grunaðir um ölvunarakstur og fjórir um akstur undir áhrifum ávana- og fíkniefna. Þeir voru látnir lausir að lokinni blóðsýnatöku.
Einnig barst tilkynning um hugsanlegan ölvunarakstur eftir að bifreið hafði verið ekið yfir kant og upp á gras. Þegar lögreglu bar að hafði bifreiðinni verið ekið á ljósastaur. Ökumaðurinn var handtekinn, grunaður um akstur undir áhrifum bæði áfengis og ávana- og fíkniefna.
Lögregla aðstoðaði einnig við að vísa óvelkomnum einstaklingum út af matsölustað og úr verslunum. Ölvuðum einstaklingi sem gekk við akbraut var ekið heim og annar einstaklingur, sem sagður var sitja fyrir tilkynnanda, var látinn hætta háttsemi sinni og vísað af vettvangi.
Þá voru nokkrir eigendur ökutækja sektaðir vegna rangrar lagningar og lögregla sinnti minniháttar umferðaróhappi þar sem engin slys urðu á fólki.
Að lokum var tilkynnt um einstakling sem sat í ökumannssæti bifreiðar og lá fram á stýrið. Lögreglumenn könnuðu ástand hans en í ljós kom að hann hafði einfaldlega fundið fyrir mikilli þreytu og ákveðið að leggja sig.
