Bandaríska strandgæslan hóf í dag umfangsmikla leit að sjúkraflugvél sem hvarf á leið frá Bermúda til Boston. Sex manns voru um borð í vélinni.
Um er að ræða Gulfstream G100-flugvél í eigu kanadíska fyrirtækisins Latitude Air Ambulance. Vélin hvarf af ratsjá um klukkan 1:30 að staðartíma. Strandgæslan hefur sent bæði skip og flugvélar til leitar undan ströndum Nantucket í Massachusetts.
Talsmaður Latitude Air Ambulance sagði í samtali við AFP að um borð hefðu verið tveir flugmenn, tveir heilbrigðisstarfsmenn, sjúklingur og einn fjölskyldumeðlimur hans.
Ekki liggja fyrir frekari upplýsingar um afdrif vélarinnar eða fólksins um borð.
Latitude Air Ambulance rekur tíu flugvélar og sérhæfir sig í sjúkraflugi og heimflutningi sjúklinga víða um heim. Fyrirtækið sinnir meðal annars flutningi fólks sem þarf læknisaðstoð milli landa.
