Í gær bárust fréttir af því að verslunin Gyllti kötturinn myndi á næstu mánuðum flytja en búðin er nú til húsa í Austurstræti. Samkvæmt Hafdísi Þorleifsdóttur, eiganda Gyllta kattarins, stendur til að nýtt húsnæði verði út á Granda.

Hafdís nefnir eina ástæðu fyrir því af hverju búðin er að flytja og sú er að Dagur B. Eggertsson, fyrrverandi borgarstjóri, hafi eyðilagt miðbæinn með því að þrengja of mikið að fólki sem vill leggja bílum í miðbænum. Bílastæðamál í bænum hafi einfaldlega kippt fótunum undan rekstri verslunarinnar.

„Mikið af mínum föstu kúnnum segjast ekki nenna lengur niður í bæ, það er hringur eftir hring, engin bílastæði. Svo hækka þeir bílastæðin þannig að ef þú leggur í bílakjallaranum undir H&M, kemur til mín og færð þér svo einn kaffibolla, þá kostar það tvöþúsund kall,“ sagði Hafdís við Vísi um málið.

Óhætt er að segja að netverjar á spjallsíðunum Reddit og Twitter hafi brugðist illa við ummælum Hafdísar og sakar fólk hana meðal annars um væl og blekkingar.

Netverjar benda meðal annars á að það séu 220 metrar frá Gyllta kettinum í bílastæðahús þar sem kostar 270 krónur að leggja fyrsta klukkutímann og 180 krónur á hvern klukkutíma eftir það. Það taki því meira en heilan vinnudag að ná upp í tvö þúsund krónur. Einn spjallverji gagnrýnir Vísi fyrir að nefna það ekki í frétt sinni og taka margir notendur undir þá athugasemd.

Einn skýtur inn í að rekstur búðarinnar, miðað við ársreikninga, gangi vel og að sala hafi aukist milli ára á sama tíma og fyrrverandi borgarstjóri á að hafa eyðilagt bílastæðamál borgarinnar.

Þeir sem taka þátt í umræðunni eru á svo gott sem einu máli að miðbærinn hafi aldrei verið í betra standi en í dag.