Tónlistar- og leikkonan Salka Sól Eyfeld opnar sig á einlægan máta í ítarlegu viðtali við sem birtist í Vikunni sem kom út í síðustu viku. Ræðir Salka meðal annars frjósemi, fæðingarþunglyndi og listsköpun.

Í viðtali ræðir hún einnig um ADHD en söngkonan hefur glímt við slíkt árum saman. „Ég kunni alveg á það og var bara geðveikt góð í því, ef svo má að orði komast. Mér fannst ADHD-ið mitt bara gjöf og finnst það alveg ennþá. Ég hef stundum djókað með það að það sé taugaröskunin sem hjálpaði mér að læra að prjóna og á hljóðfæri og gera alls konar hluti. En svo þegar áföll og tvö börn komu inn í myndina var ekki sami tími fyrir úrvinnsluna sem þurfti að eiga sér stað inni í hausnum á mér til þess að láta lífið ganga upp. Þegar maður er farinn að gleyma öllu, týna lyklum, klúðra plönum og bara missa tökin byrjar sjálfsniðurrifið og kvíðinn eykst,“ segir Salka í viðtalinu.

Hún segir að eftir að hún fékk staðfesta greiningu að hún hafi byrjað að hitta geðlækni reglulega og hafið lyfjatöku. Það hafi gert mikið fyrir Sölku. „Ég náði loks að slaka á í höfðinu,“ segir söngkonan.

„Mér líður stundum eins og heilinn í mér sé hnífaparaskúffa og hnífapörin séu allt í einu öll í réttri skúffu. Svefninn varð líka betri, og það eitt lagar margt. Það er alveg nýtt fyrir mér að leggjast á koddann eftir langan dag og hugsa: Þetta var góður dagur, nú ætla ég að fara að sofa. Ég veit ekki hversu mörgum árum ég hef eytt í að liggja á kodda og láta allt hringsnúast og muna eftir einhverju asnalegu sem ég sagði í fjórða bekk.“

Hún segist líta á lyfin sem hjálpartæki sem margir þurfa á að halda og hún sé ein af þeim manneskjum.