Sigurður Hólm Sigurðsson hefur verið dæmdur í sex mánaða fangelsi af Héraðsdómi Reykjavíkur.

Sigurður var ákærður fyrir kynferðisbrot með því að hafa, mánudaginn 4. janúar 2021 og um langt skeið fram til þess dags, á heimili sínu, haft í vörslum sínum alls 878 ljósmyndir og 113 kvikmyndir sem sýna börn á kynferðislegan og klámfenginn hátt, en ákærði geymdi myndefnið á tveimur hörðum diskum í EzCool-turntölvu og einum hörðum diski í HP Compaq Presario CQ 60 fartölvu sem haldlagðar voru af lögreglu við húsleit.

Sigurður játaði brotið en hann hefur áður verið fundinn sekur um sambærileg brot.

„Af óútskýrðum ástæðum var á hinn bóginn ekkert aðhafst í málinu um árabil eftir að rannsókn sem beindist að öðru sakarefni, sem lögregla hafði einnig til rannsóknar, hafði verið fellt niður. Engin haldbær skýring hefur í raun fengist á þessum óhæfilega drætti á meðferð málsins,“ segir í dómnum og er því dómur Sigurðar skilorðsbundinn til þriggja ára.