Auður Jónsdóttir rithöfundur og blaðakona fagnar því að Pétur Marteinsson bjóði sig nú fram fyrir Samfylkinguna í borginni.

Í Facebook-færslu sem Auður birti í gær segir hún frá kynnum sínum og syni hennar af Pétri en einhvern tíma vildi sonur Auðar, þá átta ára, sjá íslenska karlalandsliðið í knattspyrnu spila gegn Frakklandi en engan miða var að fá.

Auður skrifar:

„Finnst gaman að lesa að Pétur sé að gefa kost á sér í borgarmálin því við Leifur sonur minn eigum svo fallega sögu af honum. Þegar Leifur var smá pjakkur langaði hann svo á leik þar sem Ísland var að leika við Frakkland en það var ekki séns að fá miða.“

Sonur hennar fékk ekki miða en þökk sé Pétri, fékk hann frábæra sárabót:

„Ég var eitthvað að tala um þetta við Möggu Marteins vinkonu mína, systur Péturs, og þau systkinin göldruðu eitthvað svo úr varð að Leifur fékk að taka viðtal við Pétur um af hverju það væri ekki Pepsi Max-deild fyrir krakka. En! Það vildi svo skemmtilega til að í viðtalinu var Pétur staddur á ónefndu hóteli þar sem íslensku leikmennirnir voru allir svo Leifur heppni fékk færi á að hitta þá fyrir leikinn – og ævintýrið varð svo mikið að vonbrigðin gufuðu upp. Hér er þetta ágæta viðtal!“