Mikil óreiða og rifrildi einkenndu fundi Sósíalistaflokk Íslands og upphaf fundar Vorstjörnunnar seinni partinn í dag, í skugga lögreglukæra og valdabaráttu um fjölmiðilinn Samstöðina og fjármagn honum tengt, en hann hefur verið fjármagnaður af flokknum undir stjórn Gunnars Smára Egilssonar, fyrrverandi formanni framkvæmdastjórnar flokksins og ritstjóra miðilsins.

Fjölmiðlum var vísað úr húsinu þegar fundur Vorstjörnunnar hófst klukkan hálf sex. Ljósmyndari Mannlífs fékk hins vegar að sitja fund Sósíalistaflokksins í öðrum hluta rýmisins sem hefur verið aðskilinn milli Samstöðvarinnar, sem stýrt er af fylgisfólki fyrrverandi framkvæmdastjórnar, og Sósíalistaflokksins.

Spurði út í kæru gegn sér

Védís Guðjónsdóttir, formaður Vorstjörnunnar, var mætt á fund Sósíalistaflokksins klukkan hálf fimm. Hún hefur verið kærð af framkvæmdastjórninni fyrir meint efnahagsbrot sem tengjast fjármagnsflutningum frá flokknum yfir í tengd félög. Nokkurt uppsteyt varð á fundinum þegar Védís spurði hvers vegna framkvæmdastjórn Sósíalista hefði ekki rætt við þau sem kærð voru til lögreglu.

Sessunautur hennar greip reglulega fram í framsögu fundarstjóra, Sæþórs Benjamíns Randalssonar, nýs formanns, sem tók við af Gunnari Smára fyrir skemmstu. „Þegiðu!“ var kallað að konunni.

„Samstöðin lifir“

Ný framkvæmdastjórn Sósíalistaflokks Íslands hafði gert kröfu á Vorstjörnuna, vegna þess að stór hluti ríkisframlaga til flokksins, sem ætluð eru stjórnmálaflokkum, voru látin renna inn í Vorstjörnuna og rekstur Samstöðvarinnar, sem rekin er af öðru félagi, Alþýðufélaginu. Gunnar Smári Egilsson er ritstjóri Samstöðvarinnar og var einnig formaður framkvæmdastjórnar Sósíalistaflokksins.

„Samstöðin lifir,“ sagði Þorvaldur Gylfason, á Facebook-síðu sinni, eftir fundinn. „Örtröð var á aðalfundi Vorstjörnunnar þar sem kjörin var stjórn sem ætla má að muni áfram eiga gott og friðsælt samstarf við stöðina eins og verið hefur. Hættan er liðin hjá.“

Þar með virðist baráttan um yfirráð yfir Samstöðinni vera yfirstaðin með sigri Gunnars Smára Egilssonar og félaga hans.

Samstöðin notuð gegn flokknum

Andri Sigurðsson, sem hannaði vef Samstöðvarinnar, kvartaði undan því á Facebook í dag að Samstöðinni hafi verið beitt gegn Sósíalistaflokknum.

„Samstöðin sem var stofnuð af Sósíalistaflokknum er nú beitt af fullum þunga gegn flokknum. Ég man ekki eftir öðru eins og viðlíka áróðri. Ég fann upp á nafni Samstöðvarinnar og hannaði lógóið og smíðaði vef stöðvarinnar. Aldrei hefði mér dottið í hug að stöðin yrði notuð til að ráðast á Sósíalistaflokkinn.“

Gunnar Smári Egilsson, ritstjóri Samstöðvarinnar, svaraði honum með því að birta mynd af nýju merki Samstöðvarinnar og bjóða honum að taka hið gamla til sín aftur.

Í gær kom síðan fram að Sósíalistaflokkur Íslands hefði kært formann og starfandi gjaldkera Vorstjörnunnar, og svo gjaldkera kosningastjórnar Sósíalistaflokksins, fyrir efnahagsbrot sem tengist færslu fjármuna á milli félaga.

Sagði fundinn ólögmætan

Guðberg­ur Eg­ill Eyj­ólfs­son, ný­kjör­inn stjórn­ar­maður í Sósí­al­ista­flokkn­um, fullyrti í grein á Vísi í dag að ekkert fé hefði runnið frá Vorstjörnunni til þeirra málefna sem stjórnendur hennar hefðu fullyrt að yrðu styrkt. Hann sagði boðun fundarins ólöglega, þar sem félagsmenn hefðu ekki allir fengið hana.

Annar fulltrúi í framkvæmdastjórn Sósíalista sagði í dag að framlög sem Vorstjarnan hafi átt að veita til Leigjendasamtakanna hefðu í raun ekki borist, en því hefur formaður samtakanna hafnað. Megnið virðist hafa runnið í leigugreiðslu fyrir húsnæðið í Bolholti, sem og lögfræðiaðstoð.

Sanna stendur með eldri stjórn

Borgarfulltrúi Sósíalista í Reykjavík, Sanna Magdalena Mörtudóttur, hefur tekið afgerandi afstöðu með stjórnendum Vorstjörnunnar og Gunnari Smára Egilssyni, í deilunni og íhugar nú stöðu sína sem annar af tveimur kjörnum fulltrúum Sósíalistaflokks Íslands. Gunnar Smári og fleiri viðloðandi Samstöðina hafa hvatt stuðningsfólk til þess að mæta, enda gæti „Samstöðin lokað í kvöld“.

„Það má ekki gerast að yfirtökuliðið ná líka Vorstjörnunni undir sig,“ sagði Gunnar Smári. „Ég hvet því alla sem vettlingi geta valdið að ganga í Vorstjörnuna og aðstoða Sönnu og félaga hennar til að verja Vorstjörnuna og þá hugsjón sem hún byggir á. Ég er ekki í kjöri til stjórnar og mun ekki skipta mér af þessum fundi með öðrum hætti en að mæta og kjósa með framtíð Vorstjörnunnar og gegn yfirtöku hennar,“

Harðar deilur eru nú í kjölfar aðalfundar Vorstjörnunnar og fullyrðir félagi í Sósíalistaflokknum að fundarsköp hafi verið vanvirt.

Þá segir Morgunblaðið að fundinum hafi verið slitið þegar spurt hefði verið í hvað fjármunir Vorstjörnunnar hefðu runnið.