Þorgerður Katrín Gunnarsdóttir utanríkisráðherra ræddi mögulega inngöngu Íslands í ESB í ítarlegu viðtali við Heimildina.

Snertir hún á mörgum hlutum í viðtalinu og er meðal annars rætt um málþóf stjórnarandstöðunnar síðasta sumar og tengsl erlendra manna við íslenska stjórnmálaflokka sem eru á móti ESB.

Heimildin sagði einmitt nýlega frá því að Sjálfstæðisflokkurinn og Miðflokkurinn hefðu fengið Zachary Freeman, aðstoðarmann hins umdeilda Nigel Farage, til liðs við sig sem umboðsmann með það hlutverk að skipuleggja fundi með áhrifafólki í Bandaríkjunum.

„Við sjáum að þeir eru með sama ráðgjafa og Nigel Farage,“ segir Þorgerður Katrín. „Þannig að við vitum á hverju þessi málflutningur er að byggjast. Þegar við sjáum hvað er að gerast í íslenskum fjölmiðlum í dag og umræðu síðustu daga er alveg ljóst að það eru ákveðin öfl sem munu berjast með ráðum og dáð fyrir því að skapa mikla upplýsingaóreiðu því það hentar þeim ekki að þjóðin segi já. Það hentar þeim ekki að almenningur í landinu vakni og segist vilja sjá hvað aðild felur í sér fyrir venjulegt fólk og ungt fólk sem er að kaupa sér fasteignir eða ætlar að reyna það. Hvaða þýðingu þetta hefur fyrir matarkörfuna sem er alltaf dýrasta matarkarfan innan OECD. Hvaða þýðingu þetta hefur fyrir fákeppni sem við erum ítrekað að sjá á íslenskum markaði með meiri álagningu hér heima en er eðlilegt. Það hentar ekki öllum að fá meiri samkeppni og hverjum nýtist samkeppni best? Hún nýtist auðvitað venjulegum heimilum og nýsköpunar- og sprotafyrirtækjum sem eru að leita eftir fjármagni og fjárfestingu.“