Logi Einarsson og Eydís Ásbjörnsdóttir, þingmenn Samfylkingarinnar í Norðausturkjördæmi, mættu á fjölmennan opinn fund á Seyðisfirði í gær þar sem mikil óánægja ríkti meðal heimamanna vegna stöðu Fjarðarheiðarganga í nýrri samgönguáætlun ríkisstjórnarinnar.

Samkvæmt Austurfrétt sóttu yfir 100 manns fundinn í Herðubreið, þrátt fyrir veðurviðvörun og óvissu um færð yfir Fjarðarheiði. Sumir vonuðust til að þingmennirnir fengju að upplifa aðstæður Seyðfirðinga á eigin skinni

„Við vitum öll að þótt heiðin sé skráð opin þá er ekki fyrir hvern sem er að keyra hana, alls ekki fyrir hjartveika – vonandi fáið þið að upplifa það á eftir,“ sagði Björt Sigfinnsdóttir á fundinum en þó nokkur hiti var í heimamönnum á fundinum.

Tilefnið var að í nýrri samgönguáætlun eru Fjarðarheiðargöng ekki lengur í forgangi. Fyrsti ræðumaður fundarins, Þorvaldur Jóhannsson, kallaði breytinguna „stærstu pólitísku svik aldarinnar.“

Logi sagði að breyting á forgangsröðun árið 2023 hefði rofið þá samstöðu sem ríkt hefði um hringtengingu. Göngin saman hefðu „skapað nauðsynlega hringtengingu“ en breytingin hefði orðið til þess að „samstaðan á Austfjörðum um hringtengingu hafi brostið.“

Eydís sagði að mikil vinna hefði farið í að ná sátt um hringtengingu innan sveitarfélaganna og að breytingin sumarið 2023 hefði verið „vond“ og „sett skarð í samfélagið.“

Á fundinum komu fram miklar áhyggjur af áhrifum breytinganna á öryggi og heilbrigðisþjónustu. Eyjólfur Þorkelsson, framkvæmdastjóri lækninga hjá HSA, sagði að með því að hætta við Fjarðarheiðargöng væri „kastað fyrir róða forsendum framþróunar bæði heilbrigðisþjónustu og sveitarfélagsins Múlaþings.“

Sigurveig Gísladóttir, fagstjóri hjúkrunar hjá HSA, sagði

„Við höfum nauman tímaramma til að koma fólki til Akureyrar eða Reykjavíkur. Fjarðagöngin eru tímaramminn sem mun drepa fólk.“

Þingmennirnir sögðust ætla að styðja þá samgönguáætlun sem kæmi frá meirihluta umhverfis- og samgöngunefndar Alþingis. „Ég styð þessa samgönguáætlun eins og hún hefur verið lögð fram,“ sagði Logi og lagði áherslu á nauðsyn samstöðu ríkisstjórnarinnar. „Við höfum sjö ára reynslu af því að flokkar leggjast hver fyrir annan. Þá gerist það sama og í gangamálum síðastliðin sjö ár, ekkert!“

Fundinum lauk án þess að sátt næðist og ljóst var að traust heimamanna á fyrirhugaðri forgangsröðun samgönguframkvæmda er lítið.