Textíllistakonan Stella Ögmundsdóttir heldur prjónasmiðju á Borgarbókasafnið Gerðubergi annað kvöld en greint er frá þessu í tilkynningu frá bókasafninu. Er þetta ekki í fyrsta skipti sem hún heldur slíka smiðju.

Smiðjan er ætluð bæði byrjendum og lengra komnum og þar munu þátttakendur prjóna svokallaða Helgarpeysu eftir uppskrift Stellu.

Peysan er prjónuð úr afgöngum af garni og unnin á stórum hringprjónum, sem gerir hana fljótprjónaða. Stella hannar og prjónar undir merkjum Fözz Studio og leggur áherslu á að nýta afgangsgarn. Í smiðjunni mun hún deila hugmyndum og aðferðum við slíka nýtingu.

Mikil aðsókn var á síðustu smiðju Stellu á sama stað og búast má við góðri mætingu. Um er að ræða þriggja kvölda námskeið, en þátttakendur mega missa úr einstaka tíma.