Pílustaðurinn SKOR flytur bráðlega en merki staðarins eru komin upp í gluggum í Hafnarstræti 18.

Tilkynnt var um fyrirhugaðan flutning síðasta sumar en ekkert hefur verið gefið upp um nákvæma dagsetningu hvenær nýi staðurinn opnar.

SKOR hefur um nokkurt skeið átt í ágreiningi við íbúa í nágrenni sínu við Kolagötu vegna starfsemi staðarins og þeirra áhrifa sem hún hefur á umhverfið. Heilbrigðiseftirlit Reykjavíkur tók ákvörðun um að synja beiðni staðarins um rýmri opnunartíma. Hafði SKOR óskað eftir leyfi til að hafa opið til klukkan eitt eftir miðnætti um helgar og til klukkan ellefu á kvöldin á virkum dögum, en þeirri beiðni var hafnað á grundvelli kvartana frá nágrönnum.

Málið var síðar tekið fyrir hjá Úrskurðarnefnd umhverfis- og auðlindamála sem komst að þeirri niðurstöðu að ekki væru forsendur til að fella úr gildi ákvörðun heilbrigðiseftirlitsins. Íbúar í nágrenni staðarins hafa ítrekað kvartað yfir miklum hávaða frá rekstrinum, og mælingar sem framkvæmdar voru af heilbrigðiseftirlitinu bentu til þess að hljóðstigið færi yfir viðurkennd mörk sem talin eru ásættanleg.

Forsvarsmenn SKOR hafa hins vegar mótmælt niðurstöðunum og haldið því fram að framkvæmd þeirra hafi ekki verið í samræmi við alþjóðlega viðurkennda staðla um hljóðmælingar.