Ákæra hefur verið gefin út á hendur þremur mönnum í svokölluðu Gufunessmáli, þar sem Hjörleifur Haukur Guðmundsson, 65 ára, lést eftir ofbeldi í mars síðastliðnum. Saksóknari fór fram á áframhaldandi gæsluvarðhald yfir tveimur þeirra við þinghald í morgun, en ekki var nauðsyn á að gera slíkt yfir þeim þriðja þar sem hann afplánar nú refsingu í öðru máli.

Karl Ingi Vilbergsson, saksóknari hjá embætti héraðssaksóknara, staðfesti þetta í samtali við Vísi og segir úrskurð í varðhaldsmálinu verða kveðinn upp um hádegisbil.

Mennirnir hafa verið í haldi síðan 12. mars, en þá hófst rannsókn málsins eftir að Hjörleifur fannst alvarlega slasaður við göngustíg í Gufunesi að morgni 11. mars. Hann lést skömmu síðar á slysadeild Landspítalans.

Samkvæmt lögum má ekki halda sakborningi í gæsluvarðhaldi lengur en tólf vikur án þess að gefin sé út ákæra, nema sérstakar ástæður krefjist þess. Fleiri einstaklingar hafa réttarstöðu sakbornings í málinu en þeim hefur verið sleppt úr haldi.