Miklar umræður hafa skapast á Facebook-síðu Guðjóns Friðrikssonar sagnfræðings en hann birti færslu á samfélagsmiðlinum um nýlegt hús sem stendur við Háteigsveg 59. Húsið er í eigu borgarinnar og Félagsbústaða en það er hannað af Arnhildi Pálmadóttur, sem þykir einn fremsti arkitekt Íslands.
Guðjón er allt annað en sáttur með útlit hússins. „Ég er ekki einn af þeim sem hef allt á hornum mér varðandi nýbyggingar fjölbýlishúsa á höfuðborgarsvæðinu þó að auðvitað finnist mér þau misjafnlega falleg eins og gengur og gerist,“ skrifar Guðjón.
„Ég verð þó að játa að ég hálfpartinn hrökk í kút þegar mér var gengið upp að Sjómannaskóla í dag og sá tilsýndar þar í næsta nágrenni kolsvart nýtt hús sem lítur út eins og draugahús úr kvikmynd eftir Hitchcock. Það lá við að ég yrði myrkfælinn. Þegar ég gekk nær sá ég að klæðningin á húsinu voru sundursagaðar slitnar fjalir sem líta út eins og þær væri sviðnar eftir eld. Heimkominn fletti ég upp teikningum af húsinu á vef Reykjavíkurborgar og sá að umrætt hús er eftir enga aðra en Arnhildi Pálmadóttur sem fékk umhverfisverðlaun Norðurlandaráðs á síðasta ári og er það teiknað fyrir Félagsbústaði. Vafalaust er húsið frumlegt og umhverfisvænt en enga að síður get ég ekki varist því að það setur að mér hroll þegar ég lít það augum.“
Yfir 130 athugasemdir hafa verið ritaðar við færslu Guðjóns og er óhætt að segja að fólk skiptist í tvær fylkingar þegar kemur að húsinu. „Mikið er þetta dapurt og ljótt,“ skrifaði sjónvarpsmaðurinn Egill Helgason um húsið.
Andri Snær Magnason er hins vegar talsvert hrifinn af húsinu. „Viðurinn er sviðinn með japanskri aðferð, húsið minnir frekar á gömlu tjöruhúsin, af því ytra byrði er viður. Allt of mörg svört hús eða grá með þverliggjandi bárujárni eiga ofangreindan dóm skilið en ekki þetta. Það er fegurð í hugsun og dirfskunni,“ skrifar rithöfundurinn.
Fyrrverandi fjölmiðlamaðurinn Eiríkur Hjálmarsson tók í svipaðan streng og Andri og sagði að ytra byrði hússins væri frábært. Guðfinna Guðmundsdóttir, fyrrverandi borgarfulltrúi, segist hins vegar finna brunalykt við það eitt að horfa á húsið.
„Þetta finnst mér flott!“ skrifar fyrrverandi þingmaðurinn Margrét Tryggvadóttir. Heimspekingurinn Atli Harðarson segir að húsið tóni við myrkrið og kuldann, dumbunginn og drungann.
„Geggjað dæmi eftir heitasta arkitekt Íslands, Arnhildur er nýbúin að innrétta Forlagið á Fiskislóð, vinna Norðurlandaverðlaunin í arkitektúr, slá í gegn á arkitektabíennalnum í Feneyjum og er að reisa mjög metnaðarfulla og merkilega spennandi blokk á horni Skúlagötu og Frakkastígs,“ skrifar Hallgrímur Helgason við færslu Guðjóns, sem svarar honum með því að segja að það sé oftast mikill karakter í draugahúsum.
Að lokum segir Guðjón segja að það verði víst ekki deilt um smekk.
Þá hefur lífleg umræða um húsið skapast í Arkitektúruppreisnin á Íslandi - Byggjum fallegt aftur. Þar eru sömuleiðis deildar meiningar.
Húsið var hins vegar kynnt af Félagsbústöðum í vetur og vígt af Einari Þorsteinssyni borgarstjóra, ásamt Heiðu Björg Hilmisdóttur, núverandi borgarstjóra.
Þar sagði að „nýtt fallegt hús“ hefði verið vígt. „Arkitekt hússins, Arnhildur Pálmadóttir hlaut nýverið umhverfisverðlaun Norðurlandaráðs fyrir þverfaglega nálgun og áherslu á minnkaða kolefnislosun og endurnýtingu byggingarefnis, en stór hluti kjarnans er unnin úr endurnýttu timbri. Meðal annars fengu afgangar af steinflísum sem féllu til við byggingu Smiðju, skrifstofubyggingar Alþingis, nýtt hlutverk í íbúðakjarnanum, en þær prýða nú gólf í anddyri hans. Fleira byggingarefni var endurnýtt, svo sem afgangstimbur frá Húsasmiðjunni, afgangsgluggar frá Gluggagerðinni og afgangstimbur frá Byko en öll gáfu fyrirtækin efnið til verkefnisins.“
Á síðunni Byggjum grænni framtíð er verkefninu lýst nánar.
Athugasemdir