Silfurregn Elri Borgarsbur fékk nafn sitt samþykkt af mannanafnanefnd í ágúst en Silfurregn og Elri voru ekki skráð hjá nefndinni fyrir þann tíma. Hán hefur notast við nafnið undanfarin tvö ár áður en það fékkst samþykkt.
Mannlíf heyrði í Silfurregni til að spyrja út í nýja nafnið.
„Það er nafnahefð í fjölskyldunni, mömmu megin, þar sem flestir eru með fyrsta nafn sem er samsett orð og svo annað lítið nafn með og mig langaði að fara eftir þeirri hefð og mig langaði ekki að heita eitthvað sem allt kynsegin fólk á Íslandi heitir,“ sagði Silfurregn um nafnavalið.
„Það er ekki mikið úrval af hvorugkynsnöfnum á íslensku þannig að ég skil að kynsegin fólk sé að taka upp nöfn eins og Alex og Kai. Þegar ég byrjaði að vilja breyta nafninu mínu þá talaði ég við mömmu um það og hún gerði Facebook þráð og bað hugmyndir af kynhlutlausum nöfnum á íslensku sem tengjast náttúrunni. Sá þráður fékk fleiri en 150 svör með uppástungum. Það var mjög gaman að lesa þetta,“ en þráðurinn var búinn til fyrir um það bil tveimur árum.
Mamma Silfurregns hjálpaði svo við að setja saman lista af líklegum nöfnum út frá uppástungunum og segist hán standa í þakkarskuld við móður sína fyrir það. „Fólk er alveg að segja að þetta sé skrýtið nafn en það er samt að fara eftir íslenskum hefðum. Ég þurfi að búa mér til nýtt nafn af því að ég var ekki með gott úrval,“ en nafnið Silfur var eitt þeirra sem var á listanum
„Ég var mikið að hugsa um nafnið Regn þegar ég byrjaði í MH af því að það var eina sem ég vissi af sem var íslenskt og samþykkt af mannanafnanefnd. En svo kynntist ég æðislegri manneskju sem heitir Regn í MH en fannst að ég mætti ekki stela nafninu en mig langaði samt að hafa það með,“ sagði Silfurregn
„Ég byrjaði að nota nafnið bara í skólanum og mér fannst það festast strax. Ég var alveg hrætt að ég myndi velja eitthvað vitlaust, sem myndi ekki festast, og þá þyrfti ég að velja eitthvað annað.“
Silfurregn segir að það verið smá krefjandi að notast við nafnið í byrjun en fólk og skólakerfið hafi tekið vel í breytinguna.
„Það var alveg vesen í byrjun. Þegar ég fékk nýjan kennara þá þurfti ég að biðja þá um að segja nýja nafnið en ekki það sem stóð á blaðinu. Ég reyndar fékk að breyta nafninu inn á INNU áður en ég fékk það samþykkt af mannanafnanefnd þannig að hópalistarnir í skólanum voru með rétta nafninu mínu. MH er æði þegar kemur að þessu,“ sagði MH-ingurinn með gleði í hjarta en var óviss um að nafnið yrði samþykkt yfirhöfuð. En annað kom á daginn.
Silfurregn þarf að endurnýja öll skilríki með nýja nafninu en hán fer fljótlega til útlanda og ætlar því að gera það í leiðinni.
Varðandi önnur nöfn sem komu til greina þá segir hán að nafnið Haust hafi sennilega verið í öðru sæti.
Athugasemdir