Glæsilegt og vel við haldið einbýlishús við Hlíðarhjalla 1 í Suðurhlíðum Kópavogs er komið á sölu. Húsið, sem var byggt árið 1988, er skráð alls 284,6 fermetrar að stærð, þar af er bílskúr 46,1 fermetri.
Um er að ræða rúmgott fjölskylduhús með fimm svefnherbergjum, þar af fjórum mjög rúmgóðum, auk tveggja baðherbergja. Þá fylgir eigninni óuppfyllt og ófrágengið rými sem ekki er talið með í skráðri fermetratölu hússins en býður upp á fjölbreytta nýtingarmöguleika fyrir framtíðareigendur.
Húsið stendur á góðum stað í Suðurhlíðum Kópavogs og nýtur fallegs útsýnis. Garðurinn hefur verið ræktaður af natni og við húsið er góður pallur með heitum potti sem skapar skemmtilega aðstöðu til útivistar.
Bílskúrinn er sagður rúmgóður með góðu aðgengi og inn af honum er stór geymsla. Einnig er stórt upphitað bílaplan við húsið.
Samkvæmt upplýsingum úr sölugögnum hefur eigninni verið vel við haldið í gegnum árin. Nýlega var ráðist í viðhald á gluggum og í maí og júní á þessu ári var skipt um alls 24 rúður í húsinu.
Ásett verð eignarinnar er 179 milljónir króna. Húsið hentar vel stórum fjölskyldum sem leita að rúmgóðu heimili á eftirsóttum stað í Kópavogi með góðri útiaðstöðu og möguleikum til frekari þróunar.
Athugasemdir