Reisulegt og sögufrægt einbýlishús við Garðastræti 47 í hjarta Reykjavíkur er komið á sölu fyrir 212,5 milljónir króna. Húsið stendur á einum eftirsóttasta stað borgarinnar, í grennd við Tjörnina og stutt frá miðbænum, þar sem fjölbreytt menningarlíf, veitingastaðir og þjónusta eru í göngufæri.
Samkvæmt heimildum Minjastofnunar var húsið það fyrsta sem reist var við Garðastræti árið 1919. Um er að ræða steinhús með timburgólfum milli hæða sem hefur notið vandaðs viðhalds í gegnum tíðina. Fjölmargir upprunalegir byggingarhlutar hafa verið varðveittir, meðal annars handrið milli hæða, veggklæðningar, gólffjalir og kverkalistar, sem gefa eigninni sérstakan svip og sögulegan karakter.
Húsið stendur á 238,7 fermetra eignarlóð sem afmörkuð er með steinvegg meðfram Garðastræti og veitir þannig aukið næði. Garðurinn er gróinn og vel hirtur, með rúmgóðri og skjólgóðri viðarverönd ásamt skjólhýsi á suðausturhorni lóðarinnar. Þá er snjóbræðsla í hellulögn og tröppum sem auðveldar aðgengi yfir vetrarmánuðina.
Eignin skiptist á þrjár hæðir auk rishæðar. Inngangur er á aðalhæð að baki hússins og eru viðargólf á öllum hæðum nema í kjallara þar sem harðparket er á gólfum.
Í sölulýsingu er lögð áhersla á að Garðastræti 47 sé hús með miklum karakter og virðuleika sem sameini sögulegt gildi, vandaðan frágang og eftirsótta staðsetningu í einu elsta og sjarmerandi hverfi Reykjavíkur.
Athugasemdir