Leikarinn Steinn Ármann Magnússon er látinn, 61 árs að aldri. Hann lést á heimili sínu í Hafnarfirði föstudaginn 21. ágúst. Þetta kemur fram í tilkynningu frá aðstandendum hans.
Steinn útskrifaðist frá Leiklistarskóla Íslands árið 1989 og vakti mikla athygli á tíunda áratugnum sem annar Radíusbræðra, sem ruddu brautina fyrir íslenskt uppistand. Hann starfaði einnig við dagskrárgerð á Aðalstöðinni og Bylgjunni og var meðal stjórnenda þáttanna Radíus, Górillan og King Kong.
Á löngum ferli lék Steinn í fjölmörgum sjónvarpsþáttum, kvikmyndum og leikritum, meðal annars Limbó, Astrópíu, Hross í oss og Ófærð. Hann var einnig þjóðþekktur fyrir hlutverk kattarins Kela í Stundinni okkar og talsetti fjölda teiknimynda og barnaefnis.
Steinn lék auk þess á bassa með Kátum piltum frá Hafnarfirði og starfaði um tíma við leiðsögn ferðamanna og í Reiðhjólaversluninni Erninum.
Steinn lætur eftir sig eiginkonu og tvo syni.
Athugasemdir