Robert Tomasz Potrykus hefur verið dæmdur í fjögurra og hálfs árs fangelsi fyrir stórfellt fíkniefnalagabrot með því að hafa flutt 4.500 millilítra af amfetamínbasa til Íslands.
Samkvæmt ákæru flutti Robert amfetamínbasann til landsins 31. júlí síðastliðinn sem farþegi með flugi til Keflavíkurflugvallar. Efnin, sem voru á vökvaformi og með 40 til 45 prósenta styrkleika, voru falin í sex vínflöskum í farangri hans.
Robert játaði brotið skýlaust við þingfestingu málsins og samþykkti jafnframt upptöku fíkniefnanna. Samkvæmt dóminum var hann ekki eigandi efnanna og ekkert benti til þess að hann hefði tekið þátt í skipulagningu innflutningsins að öðru leyti en að samþykkja að flytja efnin gegn greiðslu.
Dómurinn leit til játningar hans og þess að ekki lá fyrir að hann hefði áður gerst sekur um refsiverða háttsemi. Á móti vó mikið magn fíkniefna, hættueiginleikar þeirra og að þau voru ætluð til sölu.
Þá voru fíkniefnin gerð upptæk og Robert dæmdur til að greiða rúmlega 1,87 milljónir króna í sakarkostnað.
Athugasemdir