Karl Th. Birgisson, stjórnmálafræðingur, rithöfundur, ritstjóri og útvarpsmaður, lést aðfaranótt miðvikudagsins 16. september, 62 ára að aldri. Karl hafði átt við veikindi að stríða undanfarin ár. Hann lætur eftir sig þrjú börn og tvö barnabörn.
Karl var á meðal litríkustu fjölmiðlamanna sinnar kynslóðar. Hann ritstýrði á ferli sínum Pressunni, Eyjunni og Herðubreið, auk þess sem hann stýrði hinum vinsæla útvarpsþætti Orð skulu standa á Rás 1 um árabil. Þá var hann framkvæmdastjóri Samfylkingarinnar í nokkur ár og bjó yfir yfirgripsmikilli þekkingu á stjórnmálum.
Fjölmargir samstarfsmenn og vinir hafa minnst Karls, sem jafnan var kallaður Kalli Th., og fagnað þeim arfi sem hann skilur eftir sig í íslenskri fjölmiðlasögu.
Minntist Kalla með einlægum orðum
Halla Gunnarsdóttir formaður VR minntist Karls með hlýjum og einlægum orðum þar sem hún fangaði flóknu en sjarmerandi persónu hans. Halla lýsti Karli sem hugmyndaríkum, fróðum og bóngóðum manni, en um leið beittum rithöfundi.
„Hann var hugmyndaríkur og fróður, sískrifandi og sagðist stundum breytast í skrímsli þegar hann skrifaði, beittur penni, stundum ósvífinn,“ skrifaði Halla og rifjaði upp að hún hefði einu sinni skammað hann fyrir karlrembu, sem hann hefði tekið áreynslulaust og með jafnaðargeði.
Halla sagði Karl hafa verið duglegan við að senda hvatningarskilaboð í gegnum árin. „Síðasta áratug eða svo hef ég reglulega fengið frá honum skilaboð miklu oftar hvatningarorð, 'þú stóðst þig vel í Vikulokunum', og fleira í þá veru. Hann fylgdist vel með, blaðamaður og pólitískt animal, blanda sem ég hef lært að kunna sífellt betur að meta.“
Berskjaldaður í síðasta samtalinu
Í kveðju sinni lýsti Halla einnig síðasta fundi þeirra sem átti sér stað í Áfengis- og tóbaksverslun ríkisins (ÁTVR) í Kringlunni, þar sem Karl ræddi opinskátt um baráttu sína.
„Hann sagði að honum hefði verið flogið heim í meðferð, ég vissi ekki hvaða orð á að nota í slíku samtali í áfengisverslun,“ sagði Halla um þessa hversdagslegu en mannlegu stund. Hún lauk máli sínu á því að blessa minningu þessa sérstaka samferðamanns.
Athugasemdir