Gamlar gallabuxur sem hafa legið óhreyfðar inni í skáp gætu fengið glænýtt hlutverk um helgina þegar boðið verður upp á skapandi smiðju á Borgarbókasafninu Árbæ.
Textílhönnuðurinn Guðrún Borghildur ætlar þar að sýna gestum hvernig hægt er að breyta gömlum gallabuxum og öðrum gallafatnaði í eitthvað bæði skemmtilegt og nytsamlegt.
Guðrún leggur mikla áherslu á endurnýtingu í hönnun sinni og bendir á að hráefnisbirgðir heimsins séu ekki endalausar. Í stað þess að henda gömlum fötum má því dusta rykið af sköpunargáfunni og gefa þeim nýtt líf.
Smiðjan fer fram sunnudaginn 20. september frá klukkan 13 til 14. Þar geta þátttakendur meðal annars búið til buddu, litla körfu eða látið hugmyndaflugið ráða för.
Gestir eru hvattir til að taka með sér gamlar gallabuxur og ýmiss konar efnivið til skrauts að heiman. Einnig verður hægt að finna tölur, skraut og annað smálegt á staðnum.
Smiðjan er hluti af alþjóðlega verkefninu make-a-thek sem Borgarbókasafnið tekur þátt í. Markmið verkefnisins er að skapa vettvang fyrir skapandi og framsækna neytendur.
Athugasemdir