Ökumaður ók upp á gangstétt og inn á hrekkjavökuviðburð á vegum lögreglunnar í New York á fimmtudag. Nokkrir slösuðust í atvikinu, þar á meðal barn.
Atvikið átti sér stað fyrir utan lögreglustöð í Brooklyn þar sem lögreglan stóð fyrir svokölluðum „Trunk or Treat“ viðburði í tilefni hrekkjavökunnar.
Samkvæmt New York Post var ökumaðurinn 56 ára gamall karlmaður. Hann er sagður hafa misst stjórn á svartri fólksbifreið með þeim afleiðingum að hún fór upp á gangstétt og inn á svæðið þar sem viðburðurinn fór fram.
Bifreiðin lenti einnig á sjúkrabifreið sem hafði verið staðsett á vettvangi til að bregðast við ef neyðartilvik kæmi upp.
Misvísandi upplýsingar hafa komið fram um fjölda slasaðra. New York Post greinir frá því að fjórir hafi slasast, þar á meðal barn, en CBS New York segir sex hafa orðið fyrir meiðslum. Viðbragðsaðilar hlúðu jafnframt að fleiri einstaklingum á vettvangi.
Myndir og myndskeið frá staðnum sýna talsverðan viðbúnað eftir atvikið auk skemmda á sjúkrabifreiðinni.
Ökumaðurinn var handtekinn og tekinn í vörslu lögreglu. Samkvæmt New York Post var hann látinn gangast undir öndunarpróf til að kanna hvort hann hefði verið undir áhrifum áfengis.
Ekki liggur fyrir hvað varð til þess að ökumaðurinn missti stjórn á bifreiðinni. Heimildarmenn New York Post segja þó ekkert benda til þess að um hryðjuverk hafi verið að ræða.
Athugasemdir