Sænska lýðheilsustofnunin hefur staðfest 21 tilfelli mislinga sem tengjast þjóðlagatónlistarhátíðinni Urkult í norðurhluta Svíþjóðar.
Tilfellin hafa greinst á nokkrum svæðum landsins en samkvæmt stofnuninni eiga þau það sameiginlegt að tengjast hátíðinni, sem fór fram í lok júlí og byrjun ágúst.
Meirihluti þeirra sem hafa greinst með mislinga er yngri en 18 ára og flestir hinna smituðu höfðu ekki verið bólusettir gegn sjúkdómnum.
„Mislingafaraldrar eru sjaldgæfir. Bólusetning gegn mislingum er hluti af almennu bólusetningarkerfi barna og bólusetningarhlutfallið er um 95 prósent,“ sagði sænska lýðheilsustofnunin í yfirlýsingu í dag.
Heilbrigðisyfirvöld á viðkomandi svæðum vinna nú að smitrakningu með það að markmiði að koma í veg fyrir frekari útbreiðslu sjúkdómsins.
Mislingar eru bráðsmitandi veirusjúkdómur sem getur meðal annars valdið hita, einkennum frá öndunarfærum og útbrotum á húð. Í alvarlegri tilfellum geta komið fram fylgikvillar á borð við lungnabólgu og heilabólgu.
Slíkir fylgikvillar geta haft alvarleg og langvarandi áhrif á heilsu fólks og í verstu tilfellum leitt til dauða.
