Í pistli sem Aðalheiður Ósk Þorsteinsdóttir ritar á Facebook telur hún Hreyfil hafa hunsað brot bílstjóra fyrirtækisins lengi og setur það í samhengi við meinta árás leigubílstjóra sem átti sér stað um helgina í Dugguvogi en greint hefur verið frá því að þeim bílstjóra hafi verið sagt upp störfum.

„Ég fagna því að í þessu máli var stigið strax inn, annað en í mínu máli,“ skrifar Aðalheiður.

„Á sama tíma er sárt fyrir aðra þolendur að horfa upp á að sumstaðar er stigið inn, annarstaðar ekki. Það óskiljanlegt að þetta verklag gangi ekki yfir alla starfsmenn Hreyfils.“

Aðalheiður segir að þar til í síðustu viku hafi hún reynt að koma upplýsingum um geranda hennar til Hreyfils í marga mánuði.

„Upplýsingum sem sýndu fram á brot gagnvart mér og fleiri konum. Einnig ræddi ég við einstakling í stjórn Hreyfils vegna gagna sem varðar öryggi farþega þeirra. Þeir kusu að horfa í hina áttina og vonast til þess að ég myndi með tímanum þegja. Hreyfill hafði engan áhuga á að taka við neinum af þessum upplýsingum, ráku hann ekki fyrr en almenningur hafði samband eftir að ég talaði opinberlega um geranda minn, réttarkerfið og Hreyfil,“ heldur hún áfram.

„Þeir þurfa ekki að trúa mér. Þetta snýst ekki eingöngu um mig ef þeir halda það - hann náði mér, svo það er of seint að spá í því núna,“

Hún segir að þetta snúist um að taka ábyrgð og öryggi farþega fyrirtækisins.

„Hvers vegna Hreyfill vill ekki taka við gögnum og mynda sér skoðun út frá þeim er óskiljanlegt - eitthvað sem þeir einir geta svarað fyrir. Ef þetta eru vinnubrögðin sem þeir tileinka sér þá eru þeir ekki í neinni stöðu til að auglýsa örugga þjónustu. Þessi vinnubrögð hafa valdið því að fleiri þolendur urðu til, eitthvað sem hefði verið hægt að koma í veg fyrir.“

Gerandi hennar er ekki lengur bílstjóri hjá Hreyfli og er Aðalheiður þakklát almenningi sem stóð upp fyrir henni og öðrum þolendum.

„Almenningi sem lét heyra í sér með þeim afleiðingum að þeir gátu ekki annað en látið hann fara,“ segir Aðalheiður.

„Til ykkar allra sem stóðuð og standið með okkur - takk!
Stuðningur og samstaða ykkar síðustu daga hefur gefið mér meira réttlæti og stuðning en réttarkerfið og Hreyfill gerðu á 834 dögum.“