Hlynur Sigurðsson, eigandi og yfirframleiðandi Skot Productions, fagnaði 50 ára afmæli sínu nýlega. Þar afþakkaði hann gjafir en bað gesti um að styrkja Alzheimersamtökin. Í fréttatilkynning þakka samtökin Hlyni en 250 þúsund krónum var safnað í veislu Hlyns.

„Ég þarfnast einskis og vildi frekar láta gott af mér leiða,“ sagði Hlynur þegar hann afhenti Alzheimersamtökunum styrkinn.

Sigurður, faðir Hlyns, er með heilabilun og var einn af þeim fyrstu sem sótti þjónustu í Seigluna, þjónustumiðstöð Alzheimersamtakanna. Því standa samtökin Hlyni nærri.

Alzheimersamtökin eru rekin af stórum hluta á styrkjum og því er þessi gjöf þeim mikilvæg.