Daníel Ísak Maríuson hefur verið dæmdur í fangelsi fyrir sérstaklega hættulega líkamsárás en málið fyrir tekið fyrir í Héraðsdómi Reykjavíkur.

Daníel var ákærður fyrir sérstaklega hættulega líkamsárás, með því að hafa aðfaranótt laugardagsins 26. júní 2021, á Hafnartorgi við Kolagötu 1 í Reykjavík, veist að manni með ítrekuðum hnéspörkum í höfuð og búk, þar sem hann sat á grúfu á jörðinni, allt með þeim afleiðingum að hann hlaut mar vinstra megin á gagnaugasvæði og yfir hægri kinnboga og mar á öxl og upphandlegg.

Daníel játaði brot sitt en vildi meina að árásin hefði ekki verið sérstaklega hættuleg. Á myndbandsupptöku af árásinni má sjá Daníel sparka sex sinnum í höfuð fórnarlambsins en það sat á grúfu í felum við Kolaportið. Hélt Daníel því einnig fram að margt hafi breyst í hans lífi á þeim tíma sem árásin átti sér stað. Hann væri í skóla og gengi vel.

Samkvæmt framlögðu sakavottorði hefur Daníel gengist undir fimm lögreglustjórasáttir vegna umferðarlaga- og fíkniefnabrota, allar eftir að hann framdi líkamsárásina.

„Mikill dráttur hefur orðið á málinu, bæði hjá lögreglu og fyrir dómstólum, og verður ákærða ekki kennt um þann drátt,“ segir í dómnum.

Hann var dæmdur í fangelsi í fjóra mánuði en sá dómur er skilorðsbundinn til tveggja ára. Þá þarf hann að borga fórnarlambi sínu 300.000 krónur með vöxtum.