Alexandra Briem, borgarfulltrúi Pírata, viðurkennir á spjallsíðunni Reddit að hún hafi haft rangt fyrir sér um leikskólamál í Reykjavík þegar notandi síðunnar sakaði hana um lygar. Var sá notandi að vísa í orð borgarfulltrúans frá 2022 þegar hún sagði að öll 12 mánaða börn myndu fá leikskólapláss í Reykjavík.

Í svari til notandans segir Alexandra að hún hafi ekki verið að ljúga en hún hafi hins vegar haft rangt fyrir sér en taldi sig vera segja sannleikann miðað við þau gögn sem hún hafði undir höndum á þeim tíma.

„Mér þykir það leitt, enda hefði ég ekki sagt það nema ég hefði trúað því á sínum tíma, út frá þeim gögnum sem ég hafði.

Það var ekki lygi, ég einfaldlega hafði rangt fyrir mér, og lærði það á þessu dæmi að tala varlegar um framtíðina,“ sagði borgarfulltrúinn á Reddit.

Hún segir að þrír hlutir hafi gerst sem ekki var hægt að sjá fyrir á þeim tíma:

1. Það kom í ljós mygla í þó nokkrum fjölda leikskóla sem tóku þá út af borðinu, og við þurftum að nota húsnæði sem var að opna til að taka tímabundið við þeim börnum meðan húsnæðið var í viðgerð.
2. Það komu inn nokkur hundruð börn frá Úkraínu, sem hluti af stórri hópmóttöku, það var rétt af ríkinu og borginni að gera það, og taka við þessum hóp, en þetta var sannarlega hópur sem við áttum ekki von á þegar við vorum að semja fjárhagsáætlunina, eða spá fyrir um framtíðina.
3. Það gekk hægar en við höfðum gert ráð fyrir að byggja upp húsnæði sem við áttum von á að kæmi inn.

„En meina, tek það bara á mig að ég hefði ekki átt að tala af svona mikilli fullvissu um eitthvað sem ég hefði átt að vita að ég gæti ekki fullyrt svona, og tek það líka á mig að ég hefði átt að vera skeptískari á tölurnar sem við fengum fyrir áramót. Ég veit í dag að það var full mikil bjartsýni í spám um uppbygginguna og mati á uppbyggingarhraða hjá verktökum.

Svo ég get ekki annað en beðist afsökunar, ég var ekki að ljúga, en þetta var rangt hjá mér og ég hefði átt að vita betur,“ skrifar hún að lokum.