Anna Kristjánsdóttir hyggur á ný ævintýri á sjónum. Hún ætlar nefnilega að skella sér í kafbátaferð með vini sínum.

Vélstjórinn fyndni, Anna Kristjánsdóttir skrifar um kafbát í nýjustu dagbókarfærslu sinni á Facebook. Í upphafi færslunnar segir hún frá gærkvöldinu þar sem hún og nokkrir vinir hennar söfnuðust saman á bar á Tenerife, þar sem hún býr.

„Dagur 2115 – Kafbáturinn.

Við söfnuðumst nokkur saman á Búkkanum í gærkvöldi, ekki aðeins ég og systurnar frænkur mínar, heldur og Einar Örn og Halldóra svo ekki séu nefnd Berglind og Steinar frá Vestmannaeyjum.

Við Einar Örn höfðum marga hildina háð, þó innan þeirra marka sem starf hjá björgunarsveitum gefur af sér, en Halldóra kona hans er starfandi hjá Landsbankanum hvar ég hafði lent í vandræðum með í fyrradag.“

Anna segir því næst frá löngun Einars vinar hennar til þess að ferðast með kafbáti og auðvitað var gamli vélstjórinn til í það ævintýri:

„En nú var komin ný vænting í hlutina. Einar langaði til að ferðast með kafbát, en það var of mikið fyrir Halldóru og hann bauð mér að koma með. Að sjálfsögðu var ég tilbúin til slíks ævintýris, hafði oft heyrt talað um gula kafbátinn á Tenerife og einungis á jákvæðan hátt þó án þess að prófa að fara með kafbát til sjós. Ég er svo sannarlega tilbúin til slíkrar ferðar og hlakka til.“

Nú segist Anna bíða eftir að Einar vinur hennar hafi samband varðandi kafbátaferðina en lofar lesendum sínum að ekki verði kafað neitt sérstaklega langt niður í undirdjúpin.

„Nú er bara að bíða þess að Einar Örn hafi samband og ég er tilbúin til slíkrar ferðar. Ég lofa ykkur samt því að ferðin niður í hafdjúpin verður ekkert á borð við það þegar einhverjir vildu komast niður að Titanic, enda skilst mér að ferðin í undirdjúpin verður vart nema niður á 20 – 30 metra dýpi, en samt nóg til að njóta undirdjúpanna. Sömuleiðis verður þessi skemmtiferð ekkert á við það sem áhöfnin á U-96 þurfti að gangast undir í seinni heimsstyrjöld samanber kvikmyndina Das Boot, frábærustu kvikmynd allra tíma.“