Rithöfundurinn og blaðakonan Auður Jónsdóttir segir það óþægilegt að sjá hve samkennd skorti í samfélaginu gagnvart þeim sem mótmæla aðgerðum Ísraela á Gaza. Í færslu á Facebook ræðir hún viðbrögð Íslendinga við Frelsisflotanum og meðferð Ísraels á alþjóðlegum aðgerðasinnum.

„Það er óþægilegt að lesa spjallþræði hér og þar, jafnvel færslur, og þræði sem fylgja fréttum hér á fb, þar sem hlakkar í fólki yfir því að Greta Thunberg hafi sætt misþyrmingum í haldi Ísraela eða þá að hæðst er að Möggu Stínu fyrir að sigla með Frelsisflotanum,“ skrifar Auður.

Hún segir að sum ummæli á netinu hafi verið sérstaklega óhugnanleg:

„Eitthvað hef ég rekist á þar sem fólk vonar bara að hún snúi aldrei aftur þaðan eða verði bara skotin. Og þá væntanlega Greta líka.“

Auður segir slíka orðræðu fylla sig vonleysi:

„Það er óhugnarlegt að lesa svona og fyllir mann vonleysi. Svo skrýtið til þess að hugsa að í þessu fámenna samfélagi hér kraumi í þó þetta mörgum algjör skortur á samkennd og að því virðist enginn skilningur á alvöru málsins.“

Hún spyr hvernig það geti staðið að fólk hér á landi geri lítið úr þjóðarmorði og hæðist að þeim sem mótmæla:

„Hvernig getur staðið á því að ennþá er fólk hér sem hreinlega gerir lítið úr þjóðarmorði og hæðist að þeim sem leggja líf sitt að veði til að mótmæla því? Og hvernig getur fólki fundist svona lítið mál að afmennska aðra með hæðni og illkvitni?“

Auður leggur áherslu á mikilvægi aktívisma í samfélagi:

„Aktívismi hreyfir við vitund almennings, án aktívisma í gegnum tíð & tíma værum við hér stödd á töluvert forneskjulegri stað en við erum þó stödd á. En aktívismi er þess eðlis að hann hristir upp í kyrrstöðu. Af því að hann er megnugur þess að leiða til hreyfinga – og þar af leiðandi til breytinga.“

Að lokum segir hún undarlegt hve mörgum finnist eðlilegt að láta hatursfull ummæli óátalin:

„En síðan er bara svo skrýtið að fólk skuli yfir höfuð láta svona út úr sér, án þess að blikna. Bara finnist það sjálfsagt. Og einmitt það er óþægilegt.“