Brynjar Karl Sigurðsson vill meiri aga í Breiðholtsskóla og taka upp skammarkróka og láta börnin taka afleiðingum gjörða sinna.

Hinn umdeildi körfuboltaþjálfari körfunattleiksliðsins Aþena var gestur hins vinsæla hlaðvarpsþáttar Chess After Dark í gær. Þar fór hann yfir eitt og annað með þáttastjórnendunum en klippa úr þættinum hefur farið í dreifingu á samfélagsmiðlunum en hún var birt á Instagram-reikningi hlaðvarpsins og vakið athygli.

Í myndskeiðinu tjáir Brynjar Karl sig um agavandamál í Breiðholtsskóla sem hafa verið mikið í umræðunni að undanförnu en talað hefur verið um ofbeldisöldu og úrræðaleysi gagnvart henni.

Brynjar Karl segir í klippunni að hann geti lagað agavandamálin í Breiðholtsskóla á einum mánuði.

„Ég skal bara koma þessu í gír á einum mánuði, þessm agavandamálum í Breiðholtsskóla“ fullyrðir þjálfarinn umdeildi og útskýrir svo hvernig:

„Hvernig ætla ég að gera það? Bara hættið þessu kjaftæði! Það verða bara afleiðingar. Það er bara skammarkrókar og allur skrattinn. Það þarf að taka á þessu liði. Og svo er það annað. Aginn gengur ekki bara út á það að mætir þangað og disciplin-ar allt í drasl, þú þarft náttúrulega að kynnast krökkunum og ég er ekki að segja að fólk þarna sé ekki að gera það.“

Brynjar Karl segir síðan foreldrana stórt vandamál.

„Svo er náttúrulega annað í þessu sem er alltaf rótin í þessu öllu. Það eru djöfulsins foreldrarnir. Þetta er verndaðasti hópur í íslensku samfélagi í dag. Verndaðasti hagsmunahópurinn og 20 prósent af þessu liði á að fara í einhverja ófrjósemisaðgerð.“