Bubbi Morthens lætur stórútgerðirnar hafa það óþvegið í færslu sem hann birti á Facebook í gær.

Tónlistargoðsögnin Bubbi Morthens er þekktur fyrir að láta í sér heyra annað veifið þegar honum blöskrar eitthvað í samfélaginu og það var einmitt það sem var að gerast.

Bubbi, eins og fjölmargir landsmenn, er afar ósáttur við auglýsingaherferð stórútgerðanna sem birst hafa í sjónvarpinu undanfarið. Segir Bubbi útgerðirnar reyna að „villa um fyrir landsmönnum“ með herferðinni.

„Þau segja Ríkistjórnin hlustar ekki á okkur
Hvenær hlustuðu þau á fólkið í landinu.

Stórútgerðin hefur lagt af stað í herferð til þess að reyna villa um fyrir landsmönnum og leyna þeirri staðreynd að loks hefur sitjandi ríkisstjórn tekið þá ákvörðun að gera hófstillta kröfu um auðlindargjald fyrir kvótann. Hann er þjóðareign sem ákveðinn hópur útvaldra fjölskyldna og fyrirtækja hefur í hendi sér og lítur ískalt á að sé sín eign og hann megi fara með kvótann að vild. Þessi ofsa ríka yfirstétt sér ofsjónum yfir þessu hræðilega óréttlæti og finnst allir kvarta og kveina.“

Segir Bubbi ríkidæmi sægreifanna vera „stjarnfræðilegt“ og að þeir séu komnir með ítök langt út fyrir fiskvinnslu eða skiparekstur.

„Auður þessa fólks er stjarnfræðilegur. Þau hafa notað part af auði sínum til þess að kaupa fyrirtæki með öllu óskyld sjávarútvegi og eru komin með ítök langt út fyrir fiskvinnslu eða rekstur á skipum sínum. Kvótinn er eitt en að væla yfir því að þetta sé skattur á þorp landsins er í besta falli bull. Stórútgerðin hefur ryksugað upp kvótann í þorpi eftir þorp og skilið eftir sviðna jörð og nú eyðir kvótagengið milljónum í sjónvarpsauglýsingar til þess að reyna að telja okkur trú um að það sé verið að setja skatt á landsbyggðina. Kvótalánþegar hafa lagt landsbyggðina undir hramminn sinn lengi lengi en í staðinn fyrir að stíga fram og segja: við borgum með glöðu geði, takk fyrir okkur, þá tryllast þau bakvið tjöldin og fara í stríð. Þessi fyrirtæki, þetta fólk er með slíkan auð í hirslum sínum að engu er til að jafna, en að borga til baka til samfélagsins - nei! Við viljum og ætlum okkur ekki að borga þó svo við getum það léttilega!“

Að lokum kemur Bubbi að því sem hann kallar „staðreynd málsins“, græðgina.

„Og þá komum við að staðreynd málsins: ef við strípum þetta niður í kjarnann, hvað er þá að hjá þessu gengi? Jú, hrein og klár græðgi. Ekkert annað.“