Bandaríski tónlistarmögulinn Sean „Diddy“ Combs hefur verið færður úr einangrun og aftur í almennt rými innan alríkisfangelsisins FCI Fort Dix í Nýju Jersey, samkvæmt heimildum bandaríska slúðurmiðilsins TMZ.
Combs var vistaður í einangrun í síðasta mánuði í kjölfar líkamlegra átaka við annan fanga.
Atburðarásin og viðurlög
Samkvæmt heimildarmönnum hófust slagsmálin eftir að samfangi Combs móðgaði hann. Í kjölfarið brutust út stimpingar þar sem fangarnir hrintu hvor öðrum og létu höggin dynja á hvor öðrum áður en starfsfólk fangelsisins skarst í leikinn og stíaði þeim í sundur.
Þótt Combs hafi nú verið hleypt aftur í almenna rými fangelsins er enn óljóst hvort hann muni sæta frekari agaviðurlögum af hálfu fangelsisyfirvalda vegna atviksins.
Lausnardeginum hnikað til
Atvikið virðist þegar hafa haft áhrif á afplánunartíma tónlistarmannsins en Alríkisfangelsismálastofnun Bandaríkjanna (Federal Bureau of Prisons) uppfærði nýverið opinber gögn sín þar sem áætluðum lausnardegi Combs var frestað og er hann nú skráður 20. febrúar 2028. Skömmu fyrir slagsmálin hafði lausnardagur hans verið færður fram yfir í janúar.
Combs afplánar nú 50 mánaða fangelsisdóm sem hann hlaut á síðasta ári fyrir brot tengd kynlífsmansali og vændi.
Fangelsismálastofnunin hefur neitað að tjá sig efnislega um málið við fjölmiðla og vísar til reglna um persónuvernd, öryggi og innri málefni einstakra fanga.
