Þorbjörg Sigríður Gunnlaugsdóttir, dómsmálaráðherra, tekur þátt í árlegum fundi Kvennanefndar Sameinuðu þjóðanna fyrir Íslands hönd en fundurinn var settur í gær. Greint er frá þessu vef stjórnarráðsins.

Lagði hún áherslu á mikilvægi samstöðu Norðurlandaþjóðanna í viðbrögðum við bakslag í kynja- og hinseginbaráttunni á fundi sínu með Simu Bahous, framkvæmdastjóra UN Women, og öðrum jafnréttisráðherrum Norðurlandanna við upphaf fundarins.

Samkvæmt tilkynningu frá stjórnarráðinu fjallaði Þorbjörg Sigríður sérstaklega um lagabreytingar og árangursríkt átak íslenskra stjórnvalda til að berjast gegn kynferðislegri áreitni og ofbeldi á netinu í pallborði norrænu jafnréttisráðherranna undir yfirskriftinni Sameinist okkur í viðbrögðum við bakslaginu. Jafnframt lagði ráðherra áherslu á árangur Íslands í jafnréttismálum og dró fram mikilvægi samstarfs stjórnvalda og frjálsra félagasamtaka í því samhengi.

„Íslendingar standa framarlega á sviði jafnréttismála. Við höfum tryggt rétt beggja foreldra til fæðingarorlofs, gripið til aðgerða til að draga úr ofbeldi gegn konum og stuðlað að launajafnrétti svo dæmi séu nefnd. Við erum í fremstu röð hvað varðar réttindi hinsegin og transfólks í Evrópu og stefnum að því að gera enn betur því eins og við vitum er baráttunni hvergi nærri lokið,“ sagði Þorbjörg Sigríður um málið.