Í dagbók lögreglu frá því í nótt og gærkvöldi er greint frá því að tilkynnt hafi verið um aðila sem hafði dottið með þeim afleiðingum að hann fékk skurð. Hann var fluttur á bráðamóttöku til aðhlynningar af sjúkraliði.

Þá voru aðilar handteknir grunaðir um stórfellda líkamsárás á krá. Báðir vistaðir í fangaklefa í þágu rannsóknar málsins og brotaþoli fluttur á bráðamóttöku til aðhlynningar.

Óskað var aðstoðar lögreglu þar sem tilkynnandi kvað ökumann bifreiðar hafa ekið á bifreið sína og ekki numið staðar og gert viðeigandi ráðstafanir. Ökumaður bifreiðarinnar var stöðvaður stuttu síðar og reyndist hann vera að aka undir áhrifum áfengis. Sá var handtekinn og vistaður í fangaklefa í þágu rannsóknar málsins.

Einnig var óskað aðstoðar lögreglu vegna stórfelldrar líkamsárásar á ölhúsi. Einn var handtekinn og vistaður í fangaklefa í þágu rannsóknar málsins að sögn lögreglu.

Þá var tilkynnt um líkamsárás sem átti sér stað í verslunarmiðstöð en gerandi var ekki á staðnum þegar lögreglan mætti á svæðið og er málið í rannsókn

Mikið var um ölvun og ölvunarakstur að sögn lögreglu. Alls voru 112 mál skráð í kerfi lögreglu og gistu 13 fangaklefa.