Ekki verður innritað í fjóra leikskóla í Reykjavík á þessu ári vegna framkvæmda og viðhalds, samkvæmt tilkynningu frá Reykjavíkurborg. Um er að ræða leikskólana Hagaborg, Sæborg, Borg og Vinagerði. Foreldrar eru hvattir til að yfirfara og uppfæra leikskólaumsóknir sínar fyrir 2. mars 2026.

Úthlutun leikskólaplássa fyrir haustið 2026 hefst 2. mars og fer fram í kennitöluröð, þar sem elstu börnin fá boð fyrst í þá skóla sem valdir voru í umsókn. Samtals detta 169 leikskólapláss tímabundið út vegna framkvæmda, en á móti er gert ráð fyrir að 277 ný pláss bætist við á árinu. Nettófjölgun plássa á árinu verður því 119.

Af nýju plássunum eru 25 þegar komin í Klettaborg. Þá er gert ráð fyrir nýjum eða endurnýjuðum plássum í Árborg, Brákarborg, Hulduheimum og Seljaborg, auk nýs leikskóla við Rafstöðvaveg. Framkvæmdir eru mislangt komnar, en áætlað er að starfsemi geti hafist í nýjum leikskóla við Rafstöðvaveg í lok árs 2026.

Fjölgun leikskólaplássa fyrirhuguð 2027

Reykjavíkurborg gerir ráð fyrir verulegri fjölgun leikskólaplássa árið 2027. Um mitt ár 2027 er áætlað að 372 ný pláss verði komin til sögunnar með nýjum leikskóla á Fossvogsbletti og viðbótarhúsum við Vesturborg, Grandaborg, Jörfa, Maríuborg og Hólaborg.

Bent er á að innritun í ný pláss fari fram í áföngum þar sem tíma tekur að manna störf og koma starfsemi í fullan gang.

Hagaborg flytur í Grandaborg

Ákveðið hefur verið að flytja starfsemi Hagaborgar í nýuppgert húsnæði Grandaborgar við Boðagranda í lok febrúar. Með flutningnum verður starfsemi Hagaborgar sameinuð undir eitt þak. Leikskólanum Hagaborg verður lokað tímabundið frá 1. september vegna umfangsmikilla viðhaldsframkvæmda og verður því ekki innritað þar fyrir næsta skólaár. Öll börn með vistun í Hagaborg færast sjálfkrafa yfir í Grandaborg.

Sæborg, Borg og Vinagerði

Í Sæborg þarf að fækka plássum á meðan stækkun stendur yfir og verður því ekki innritað þar í haust. Í Borg verður heldur ekki innritað vegna flutnings starfsemi og viðhaldsframkvæmda. Leikskólinn Vinagerði hefur verið lokaður vegna ástands húsnæðis og verður ekki innritað þar.

Fram kemur í tilkynningu frá borginni að foreldrar barna sem hafa valið Hagaborg, Sæborg eða Borg í umsóknum sínum, eða óskað eftir flutningi þangað, þurfa að breyta umsóknum sínum fyrir 2. mars.